Umkagigaba ecaleni lokucekela impahla
Kubalwa nomyeni wayo ugigaba kubamangali
IZOVELA kusasa enkantolo inkosikazi yowayengungqongqoshe wezasekhaya nowezemali kuleli, umnu Malusi Gigaba, eboshwe ngoLwesihlanu ngecala lokucekela phansi impahla.
Ngolwesihlanu ulale ebaliwe unkk Nomachule (unorma) Gigaba, waze wadedelwa izolo ezitokisini zasesiteshini samaphoyisa ebrooklyn, epretoria. Ummeli wakhe uvictor Nkwashu ucashunwe kwitimeslive eqinisekisa ukuthi ukhishwe ngebheyili kar5 000, nokuthi uzovela kusasa enkantolo.
Izindaba zokuboshwa kukankk Gigaba bese zisabalele okomlilo wequbula ngolwesihlanu kusihlwa emithonjeni yabezindaba nasezinkundleni zokuxhumana.
ILANGA Langesonto lithole ngemithombo yalo esondelene kakhulu nophenyo ukuthi impela ngunkk Gigaba uboshiwe.
Okhulumela uphiko lwamaphoyisa oklebe ubrigadier Hangwani Mulaudzi, ukuqinisekisile ukuboshwa kwenkosikazi yobengungqongqoshe angamdalulanga ngegama, wathi ubo-shelwe ukulimaza impahla nokushaya, waveza ukuthi bona njengoklebe kungenzeka bamthwese amanye amacala kusasa ngoMsombuluko.
“Icala alenzile ngelobugebengu ( criminal) kodwa nathi singenelele ngoba kukhona esimfunela khona. Ngeke sitshele izwe ngaphambi kokuba simthweswe lawo macala,” kusho ubrig Mulaudzi.
Ngokuthola KWELANGA Langesonto amacala avulwe ngabantu ababili, okukholakala ukuthi phakathi kwabo kukhona nomnu Gigaba, ongumyeni kankk Gigaba.
Ukuvela kwezindaba zokuboshwa kwale nkosikazi yobengungqongqoshe kuyamaniswa nendaba ebisematheni kusukela ngasekuqaleni kwesonto, yokusabalala ezinkundleni zokuxhumana kwe- video yemoto yakwanokusho, imercedes-benz G-wagon ebiza izigidi zamarandi, ebiklwejwe umzimba wonke.