UZOHLONISHWA NGE-LIFETIME AWARD U-BENJAMIN DUBE

IZOHLONISHWA ngendondo yelifetime Achievement inkakha yomculo wokholo, ubenjamin Dube ( osesithombeni).

Le nkakha izohlonishwa emcimbini wesouth African Music Awards, ozokwenzeka ngendlela eyehlukile kulo nyaka njengoba izwe lisagonqile ngenxa yokubhebhetheka kwegciwane icovid-19.

Udube uzohlonishwa nodan Tshanda osanda kudlula emhlabeni.

Lo mcimbi uzokhonjiswa bukhoma esiteshini esikhokhelwayo, imzansi Magic, kusukela ngomsombuluko mhla ka-3 kuya kulwesihlanu mhla ka-7 kwephezulu njengoba uzobe uyiziqephu ezinhlanu ezizothatha imizuzu engu-30 kusukela ngo-8:30 kusihlwa. Udube ungomunye wabaculi bowokholo abayibekile induku ebandla kulo mkhakha njengoba eqale ukuzakhela udumo kusukela ngo-1986.

Useke wanandisa emazweni ahlukene okubalwa kuwo I-USA, Sweden, Netherlands, France,

Australia, Japan ne-england.

Ubuye abe ngumfundisi onebandla lakhe, kanti useke washiyelana inkundla nabanye abafundisi abadumile emhlabeni okubalwa kubo ubishop TD Jakes, Kirk Franklin no-andrae Crouch.

Kulo nyaka kugujwa iminyaka engu-26 amasama aba khona.

Isikhulu esiphezulu samasama, umnu Nhlanhla Sibisi, ubongele abazohlonishwa kulo nyaka.

Ephawula ngokuhlonishwa kukadan Tshanda, uthe lena yindlela abonga ngayo amagalelo akhe nokumhlonipha ngeqhaza alibambile emculweni.