Beziqinile ezokuphepha kwembeswa uminnie
Intatheli iyalelwe ukucisha isithombe
BEZIQINISIWE ezokuphepha emcimbini womembeso kasaziwayo kwezikamabonakude, uminenhle Dlamini obuwenzelwe kubo eglenhills, edurban North enyakatho yetheku izolo ngomgqibelo.
Emgwaqweni ongenela kubo kaminenhle ubukhangwa yizimoto ezinkulu zilawulwa abaqaphi abebegqoke izikibha ezimhlophe namabhulukwe amnyama. Esangweni bekunezinsizwa ezi- mbili ebezigqoke amasudu amnyama ebezingabanye babaqaphi obudlula kuzona ngaphambi kokungena egcekeni lakwadlamini.
Obondeni olusesangweni bekunamabhodi amabili abhalwe zonke izinto ezingadingekile kulo mcimbi kubalwa ukushuthwa kwezithombe nezikhali.
Umcimbi uqale ngale kwehora leshumi umndeni wakwajones ungena egcekeni uholwa ngamabutho abeqashiwe ukuba aphele- zele uquinton Jones nomndeni wakubo ehuba amahubo, afike abashiya behleli njengoba umcimbi bewenzelwe egcekeni. Umndeni wakwadlamini ube usukhipha iziklabhu zokuhlabisa abakwajones.
Umndeni wakwajones ube usuqala uhlelo lwezipho wembathisa umndeni wakwadlamini. Unina kaminnie wembathiswe ngobhulankethe ababili nesitofu esikhulu sakwadefy nobhasikidi obugcwele izinto ezinhlobonhlobo nokunye okuningi. Umanxumalo, unina kaminnie, eseqedile ukwembathiswa usukume washaya ingoma yesonto ethi "Manje Nkosi ngiyamangala.” Bekubonakala ukuthi uyazibongela. Ududu Khoza wokhozi FM ubengomunye wabembathisiwe ngengubo yokulala, iphinifa neduku. Uze wayophuma esangweni egiya ezibongela.
Ngokuqhubeka kosuku umphathi wohlelo obelokhu ebakhumbuze njalo abantu ukuthi akuvumelekile ukushutha, ucele ukuba kulandwe uminenhle ofike egqoke ingubo emhlophe ehusha phansi, ehlotshiswe ngokusadayimane, ekhashwa yizimpele- si zakhe wafike wahlala etendeni qede uquinton Jones wamjoyina.
Ujones ube eseqala uhlelo lokufaka imali ekhanda likaminenhle inqwaba yo-r200. Kulandele ngokuba ifaswe igcwale isambulela abezemboze ngaso. Nomndeni wakwadlamini ube usuwembesa umndeni wakwajones, umkhenyana bamembese nangeyembe imbala.
Ngenxa yokuthi ubaba kaquinton Jones akasekho emhlabeni, bathe bacela abanjelwe ngumfowabo kwase kwembathiswa yena. Njengoba ezokuphepha beziqinisiwe, intatheli YELANGA Langesonto izamile ukushutha ngomakhalekhukhwini ayibona amalunga omndeni abhoka ngolaka, yacelwa ukuba icishe zonke izithombe ebezikhona bese iyagoduka.
Phakathi kosaziwayo ebebekhona singabala uzakes nonkosikazi wakhe unandi Madida, unkosikazi kangqongqoshe wezezimali umalusi Gigaba, unkz Noma Gigaba, unathi Msengana owumculi nabanye abaningi.
Ingqephu ibidla lubi njengoba abaningi bebevunule beconsa ngokwesintu njengoba isimemo sasisho kanjalo.