UTHEMBISA NEZIPHO EGUBHA INYANGA AZALWA NGAYO
BAHLELELWE injabulo nezipho abathandi bomculo we- kwaito, njengoba usboniso Dlamini odume ngelikaMsawawa, kuyinyanga yakhe yokuzalwa le kantulikazi (July).
Umsawawa ongene emculweni esaqhasha esikhwameni uma ezodansa esiteji ngenxa yobuncane bakhe ngaleso sikhathi, uzalwe ziyisikhombisa eminyakeni engamashumi amabili nambili (28) eyedlule.
Izinhlelo zokugubha usuku lwakhe ziqale ngalo ulwesihlanu, ezamani’s Kwanyuswa, kanti uthi uzohambela izindawo ezahlukene.
Emasontweni ambalwa edlule ubehambela izikole ephisana ngemifaniswano kanti kulokhu uthi uzoba nezipho ezahlukahlukene ezisondelene nadume ngakho, okuwumculo njengoba ekhulele phambi kwabo laba bantu azohambela izindawo abazithokozisa kuzona.
Phakathi kwezindawo azihlelile yi-o.t Zone elovu abeyihambele izolo ngomgqibelo. Mhla zili-14 kwephezulu uzohambela ethatha’s Farm, estanger, kuthi mhla zili-16 avakashele etc’s Kwandengezi bese edlulela emsawawa’s Corner eclermont okuyindawo yakhe.
Kuzothi mhla zingama-28 ayobajuxuzisa elugaju Lounge, kuthi zingama-29 athi 'dlala kayona' edassenhoek bese bevala ekhumbul’ebusuku, ejozini zingama-30 nalabo abazobe bemphelezela.
Uthi lokhu ukwenze ngalesi sikhathi sonyaka ngoba kuyiso- na esibalulekile empilweni yakhe, okuyisikhathi afika ngaso kulo mhlaba.
“Abantu abasithandayo bayathanda ukuhlala nathi ngakho-ke ukuhlala nabo ngesikhathi esibaluleke kangaka empilweni yami kubalulekile. Ngizobaphathela nezinto eziyisipesheli ngokomsebenzi wami abazozithokozela okuzoba yizipho, sigubhe ndawonye usuku lwami noma inyanga yokuzalwa kwami,” kusho yena.
Yinto eyaziwayo ukuthi ungomunye wabaculi abajatshulelwa kakhulu uma besesiteji ngenxa yemidanso nezenzo zakhe nabamdanselayo, ekotela nasemapalini, egibela ophahleni lwesiteji. Uthi kulezi zindawo uzophelezelwa ngozakwabo asondelene nabo emculweni. zowakha@ilanganews.co.za