Umalema ukhwele wadilika kuzuma
Uthi amacala enkohlakalo ayomlandela noma eselele kobandayo
USHIYE angalazi kumengameli wezwe umnu Jacob Zuma nasemalungeni omndeni wakhe ukhomanda Omkhulu we-economic Freedom Fighters (EFF) umnu Julius Malema emcimbini waleli qembu wokugubha iminyaka emine lasungulwa obuyizolo ngomgqibelo, ecurries Fountain, ethekwini.
Umnu Malema usole umnu Zuma ngobusela, ethi ngisho asekobandayo umsholozi ngeke nangengozi umndeni wakhe usinde emacaleni enkohlakalo. Uthi noma I-EFF ingangena emandleni engasekho emhlabeni umsholozi, amacala ayovulelwa indodana yakhe endala, umnu Edward Zuma. Umnu Malema ubuye wakhwela wadilika nakwisekela likamengameli wezwe umnu Cyril Ramaphosa.
Lo mholi akamshiyanga ngaphandle udkt Blade Nzimande weSouth African Communist Party (SACP) emsola ngokugibela phezu kwegagasi LE-EFF athe yiyona eqhumbuze akubize ngenkohlakalo ethinta nokushaqwa kombuso. Muva nje udkt Nzimande usehuba ingoma engahambisani nobuholi bukamsholozi oyamaniswa nomndeni wezinjinga zakwagupta osolwa ngokushaqa umbuso.
Umalema uqale inkulumo yakhe ngokukhuza isiqubulo esithi, "Phansi ngozuma Phansi! Phansi nge-anc phansi! Phansi ngosihle Zikalala phansi!" Ubuye wasola kakhulu amandiya akwaZulu-natal ngokuthi acetshiswa ngosopolitiki bakulesi sifundazwe esiholwa yi-african National Congress (ANC). Uthe umsholozi ucebisa umndeni wakhe kuphela, ebalula umnu Khulubuse Zuma nomnu Edward Zuma.
Uthi nakuba leli lizwe selineminyaka engama-23 lakhululeka kodwa abantu abampisholo basaphila ngaphansi kwengcindezelo eyadalwa nguhulumeni wobandlululo.
Nokho ukugcizelele ukuthi kabanankinga nabamhlophe, uthi abangabafuni yilabo abasagcwele insila yobandlululo. Ubuye wasola necongress of South African Trade Unions (Cosatu) ngokufana nenja engenawo amazinyo.
Uthi phambilini beyihlanganela ecurries Fountain ukuqhamuka nezixazululo ezinkingeni zezisebenzi kodwa namuhla ibonakala itetemuka nomengameli. Uthi ngokuhlanganyela nenhlangano ebusayo badayise izwe elalwelwa kanzima.
Uncome ubudlelwano asenabo nesilo samabandla, ugoodwill Zwelithini njengoba leli qembu like lavakashela esigodlweni laxoshisa ungangezwe Lakhe ngezinkomo.
Ukhale ngehhovisi lesishoshovu esasilwela ukucindezelwa kwabantu abamnyama ngesikhathi sikahulumeni wobandlululo, umnu Robert Sobukwe athi kalinakiwe kodwa kunakwe umuzi kamengameli wakuleli. Uthe bazovakashela leli hhovisi ukuhlonipha leli qhawe lomzabalazo.
Utshele abebethamele lo mcimbi ukuthi kabafuni I-EFF igcine isifana NE-ANC. Uqhube wathi basazoqhubeka ukukhuluma ngomengameli ngoba uyehluleka ukugcina izidingo zezwe.
Uthi kabekho abebephawula ngendlela umnu Zuma aphethe ngayo kwaze kwaba YI-EFF ethi ‘Zuma Must Fall’.
Lo mcimbi ubuhanjelwe nangamalunga ephalamende E-EFF okungumakoti Khawula, ugodrich Gardee, udali Mpofu nosekela Khomanda ufloyd Shivambu noMbuyiseni Ndlozi.