I-DA ifuna incazelo ngezigidi

Ezisetshenziswe kwi-essence

UMHOLI wedemocratic Alliance kumasipala wetheku, umnu Zwakele Mncwango, usola oyinhloko yophiko lwezokuvakasha kulo masipala ngenkohlakalo mayelana nezinhlelo zomcimbi i-essence Festival.

Lo mholi uthi kuzomele umnu Phillip Sithole akuqonde ukuthi imali yomkhandlu akusiyo eyakhe nobhululu bakhe kodwa ngeyomphakathi.

Umnu Mncwango uthi umasipala ugcine sewengeza ngo-r68 million emalini ewu-r35 million obekufanele isetshenziswe emcimbini wangonyaka odlule, i-essence. Ufuna kuhlale obala ukuthi yenzeni yonke le mali echithiwe.

Uthi umcimbi wakulo nyaka bekungamele uqhubeke kungazange kuhlale obala ukuthi kwenzekeni ngemali yangonyaka owedlule. Uthi lo mcimbi uqhubeka ngoba umnu Sithole engumuntu ozithwele.

“Kuyilungelo lomphakathi ukwazi ukuthi imali yawo yenzeni. Akahlangene neze umnu Sithole nalo mcimbi, wumnyango wezobuciko namasiko - oholwa ngumnu Thembinkosi Ngcobo - ohlangene ne-essence. Umnu Sithole uphethwe wukuphapha,” kuchaza umnu Mncwango obezwakala ukuthi udinwe uyaqhuma.

Uthi umnu Sithole kumele acacise ngezinkampani eziqashwe ngonyaka owedlule ukuthi ngezobani futhi zathola malini.

Eziphendulela kulezi zinsolo, umnu Sithole uthe kayikho le nto eshiwo ngumnu Mncwango. Uthi umnyango wezobuciko namasiko nowezokuVakasha iyasebenzisana emcimbini we-essence.

“Kawukho umgomo okhishwe wumaspala othi kumele kuchazwe kabanzi ngezimali ezisetshenzisiwe uma kwenziwa imicimbi. Sike saba nedurban July, icomrades Marathon neminye exhaswa wumasipala - kungani engakhonondi ngale micimbi? Umnu Mncwango akazazi ukuthi ufuna ukuthini, akavele athule,” kusho usithole.

Uthi lo mcimbi wahlelwa ngowezi-2014, umnu ncwango bekumele ashaye ngonyawo phansi ngaleso sikhathi, acacise ukuthi akahambisani nawo.

“Ubekhona ngozibandlela (December) emhlanganweni wokuhlela i-essence yakulo nyaka kodwa akashongo lutho. Kungani esekhuluma manje? Ngibona sengathi usethatha izinto ngenhliziyo,” kusho umnu Sithole.