Uke wathandazela abantu unomkelemane
“ZIYAKHULEKA izinkomo zingezikagidli gadla saf’isiphongwana, Zapiqa zapiqela umfazi wendoda, Dadaza wemdadazi, lahla nkawu.
Lona okubingelelayo ngufukuzawomncwado, ihlo lami laze langilaya ngokubuka amathanga, ntombi kazibambezeli kazipholisi maseko, kusho eyakho ayingibambezelanga ayingipholiselanga maseko, umama wengane yakho ngambalekela mina engilandela.”
Izisho kanjalo insizwa yasethaleni enkandla, unomkelemane osezakhele ugazi kubabukeli besiteshi sikamabonakude I-1KZN TV esizinze erichards Bay, enyakatho yekwazulu Natal.
Le nsizwa eyaqanjwa amagama ayo ngodadewabo yaze yashaya nepasi yawabhala phansi nguhector Sibongiseni Mthokozisi Langa. Izalwe lulunye kumasingana (January) ngonyaka we-1978. Izalwa ngumnu Zeblon Ntshilibani Langa nonkk Rejina Sisana Langa abangasekho.
Wabelethelwa ekhaya hhayi esibhedlela, washunqiselwa ngazozonke izinyamazane, wakhishwa umnqantula, wakhishwa inyoni, wancela wadela.
Uzalwe embethe kwathi esekhulile izinto zakhe zangamhambela kahle, abanamanga bamtshela ukuthi uthwele igama likakhokho wakhe unomkelemane owabe eyibutho unokhenke elayibamba empini yasesandlwana okumele alivuse, kwaphoqa ukuba ayoshintsha ipasi awalahle onke amanye amagama.
Uma uxoxa nomkelemane usuke uthinte isidleke semivi akakhulumi uyampompa, kungaphela lonke iphephandaba uma singalanda izwi nezwi lalokho akushoyo. Ufunde amabanga aphansi Kwachwazi Higher Primary, Mpucuko H.P, Mnqandi High School, nasenkandla High School. Waqeda ibanga leshumi emnqandi High ngonyaka we-1997.
Uqede esikoleni wayofundela ukudlala imidlalo yeshashalazi nezokungcebeleka emlazi.
“Ubaba ungishiye emhlabeni ngineminyaka eyisi-7. Angikwazanga ukuqhuba izifundo zami engangifisa ukuzenza zobudokotela. Ngaphoqeleka ukuba ngiyokwenza ispeech and Drama ethekwini. Ngibe lapho ngonyaka we-1998 kuya kowe-1999. Ngonyaka we-2000 ngiye egoli ngayozama inhlanhla ngoba umsebenzi bengingawutholi, ngigcine sengiwumantshingelane kwaze kwaba wunyaka wezi-2002, ngiyibulala imali ngihola ur1 000 ngenyanga,” kulanda unomkelemane.
Wathatha le mali abeyisebenza wathenga amaswidi namakapisi, ewadayisa erenke yasewanderers egoli, wathi esaqhubeka nokudayisa wathola umsebenzi efemini esebenza ngemishini.
WAPHOXWA EYOBONGELA UMENGAMELI ZUMA
khona isithunywa ngumthandazi wakwagumbi, etsakane, saphakama ngaqala ukuthandazela abantu kwaphoqa ukuba ngibuyele ekhaya ngiyokwenza lowo msebenzi.
Yingaleso sikhathi engabona khona umbono wokuthi umnu Jacob Zuma uzoba ngumengameli yize wayekhungethwe ngamacala.
Ngazama ukuba ngiyiswe kuye ngagcina ngilitholile lelo thuba, sakhuluma naye kwaze kwaba sezinzulwini zobusuku, ngagcina sengiyimbongi yakhe.
Ngesikhathi eseyofungiswa ekubeni ngumengameli e-union Buildings epitoli ngahlelelwa yonke into ngihamba nomndeni wakhe.
Lwafika usuku nesikhathi sokuba ngiyombongela, ngabuya nginyobozela ngoba ngathi uma ngifika sengithi ngiyaqala nje intokazi ethile yangibuza ukuthi nginguxaba yini ngathi angisiye yathi angifuneki, kufuneka uxaba. Kwala noma abakwazuma bethi bayayitshela yathi akusiwo umcimbi kazuma lowaya ngokahulumeni angiyombongela enkandla hhayi kulowa mcimbi. Kuze kube namuhla lokuya kuphoxeka angikakukhohlwa,” kusho ulanga.
Isekhona necd enezibongo zikamsholozi ehashwa ngunomkelemane. Emuva kwale ndumalo unomkelemane uye erichards Bay esazama yona impilo, lapho wajoyina ikwaya yomculo wegospel izululand Gospel Choir washeshe washiya lapho ngoba ubeba matasa ehamba ebongela umsholozi, abaholi bekwaya bangakuthanda lokho.
Uncoma ubhekani Thabede owamsiza ukwenza izifundo zeProject Management, wabe esedlala umdlalo weshashalazi owabe usihloko sithi “Mkabayi kajama” baze babuya egrahamstown beyodlala.
“Ngaleso sikhathi ngabuye ngahlangana nombali Gumede lona engethula naye uhlelo ngoba sasike sacula naye ekwayeni esengiyishilo. Kulo mdlalo bengiba yimbongi yamakhosi akwazulu, umbali egida ingoma aphinde acule.
"Ngifikelwe umcabango wokuba ngiyocela kwabakwa-1kzn TV ukuba bangivumele ngilethe uhlelo lomculo wesintu nezindaba zakhona. Ngaya kumnu Gedeon Eksteen obephethe umsebenzi ngaleso sikhathi wavuma, wanginikeza uhlelo olwabe lusihloko sithi “African Rhythm.
Kuhambe kwahamba ngacela ukuba bangivumele ngenze uhlelo lomculo wesintu engizolwenza nowesifazane kwathiwa angimle- the, nebala wafika umbali bambuza imibuzo ngolwazi analo ngezikamabonakude zayima emthumeni. Kuthe uma bethi bayamchitha ngabatshela ukuthi ngizomfundisa mina ngoba yimi uphrojusa wohlelo, wonke umqondo walo ukimi. Siluqale kanjalo-ke lolu hlelo UGUBHU LWAMI, sizihlelela thina izingubo ezigqokwa kulo nezinto zesintu, kuwumthwalo wethu ukuba lube yile nto oluyiyona. Kuyasithokozisa ukuthi kuthe uma kwenziwa inhlololuvo ababukeli balukhipha isithathu ezinhlelweni ezikhona, ucwaningo lukhomba ukuthi bangaphezu kwesigidi abalubukelayo,” kusho yena.
Unkz Elize Veljoen osephethe izinhlelo usevele wasinika izinsuku eziyisihlanu njalo ntambama ngehora lesi-6 kuya kwelesi-7, ngomsombuluko umculo kamasikandi, Lwesibili umculo kamasikandi, ngolwesithathu yisicathamiya, ngolwesine sihambela imicimbi yesintu ngolwesihlanu ngumculo wase-afrika,” kuphetha unomkelemane.
Unomkelemane uthi uyalibonga leli toho aliphiwa ngabakwa1KZN TV kepha angakuthokozela ukuthola umsebenzi ozinzile aqashwe ngokugcwele ukuze azakhele umuzi othi yena, ondle izingane zakhe.
Okunye ngaye:
. Akashadelwe.
. Akanamuzi, uhlala emqashweni.
. Akanamoto.
. Izingane zine.
. Uziphilisa ngamatoho nokuqashwa.
. Ungumculi kamasikandi, udlala isigingci.
. Uyathwasa.