EZESIMANJE:
UMA ungumzali kujwayelekile ukuba ubhekane nenselelo lapho kumele uthengele ingane amathoyizi.
Into eba yinkinga wukwazi ukuthi kungabe lelo thoyizi lizomsiza ngani umntwana noma mhlawumbe lizoba namthelela muni ekukhuleni kwakhe. Ngikhumbula ukuthi kuke kwaba nenkulumo-mpikiswano mayelana nokuthengela abantwana babafana amathoyizi ezibhamu. Abanye abazali bebekubuka lokhu njengento egqugquzela abafana ukuba bakhule babe nodlame futhi bathande izibhamu, okuyinto engeyinhle kwazise buningi ubutha obudalwa yizibhamu emphakathini esiphila kuyo.
Mhlawumbe ezinye izingane zingasebenzisa izibhamu ngenhloso yokulingisa amaphoyisa, amasosha noma izigebengu ezisuke zizibona kumabonakude. Kuyinto engephikwe ukuthi ngisho kungabe sisetshenziswa ndlelani isibhamu kodwa sinobungozi.
Inselelo le kayigcini kumathoyizi abafana kuphela kodwa ngisho nawezingane zamantombazane. Uma kubukwa odoli abadlalwa ngamantombazane akekho ongazi ukuthi esikhathini esiningi bakhiwe bafana nezinye izizwe okungabelungu nabomdabu wasendiya.
Lokhu mhlawumbe kugcina sekunomthelela ekukhuleni kwengane yentombazane, wokuthi (umthelela) ubuhle ibujaja ngonodoli osuke uphambi kwayo. Kusukela ezinweleni kuya ebuncaneni bomzimba nasekukhanyeni kwebala. Ngokukadokotela Melita Heyns, oyichild Psychologist, amathoyizi anomthelela endleleni ingane ekhula ngayo.
“Akusiwo awokujabulisa umntwana nje kuphela. Onodoli badlala indima enkulu ekukhuleni komntwana wentombazane. Yingakho kubalulekile ukuba amathoyizi asize umntwana ekutheni abe nokuzethemba,” kusho udkt Heyns.