3. WAQALE WAYIVUMA INGANE, USEYAYIPHIKA MANJE
PASTOR: Nginoyise wengane eyadlula emhlabeni, manje ngikhulelwe futhi. Le eyashona wayivuma nalena uyivumile wathembisa ukuyokhokha ekhaya.
Kuthe sekufika usuku lokuba athumele abantu ekhaya wajika, wayiphika le eyashona, wathi uvuma le engiyikhulelwe kuphela kanti yashona vele engayondli kwaleyo ethi wesaba omunye unina wengane yakhe.
Akasafuni nhlobo-ke ukuyohlawula manje, sengicabanga ukumshiya ngizikhulisele ingane yami, angaphinde ayinuke.
IMPENDULO: Ngiyazwelana nawe dadewethu kulesi simo obhekene naso. Kodwa-ke la emhlabeni kunezimo ongathi uma ucabanga ngazo zikushiye umelwe yingqondo nje. Ngicabanga ukuthi lo mlisa othandana naye mhlawumbe akasakudingi empilweni yakhe, ngishiso wukuthi uma ingane isaphila wathula uma isishonile yangcwatshwa usethi akusiyona eyakhe, singeke sayimba ingane emathuneni bese si- bona ukuthi kwakungeyona eyakhe ngempela futhi naye uyakwazi lokho.
Lapha empilweni uma umuntu engasakudingi uyaye akusole ngento ongeke wenza lutho ngayo futhi ongeke usahlehla uyilungise.
Kuyokusiza ngelinye ilanga ukuba uqunge isibindi umbuze ngqo ukuthi uchaza ukuthini ngale nto ayishoyo futhi ucabanga ukuthi kwenziwenjani.
Ngoba kubuhlungu ukuhlala nomuntu othandweni kanti uncengile yikho nje ugcine ubuzwa imibuzo engaphenduleki nengenazimpendulo. ngicabanga ukuthi ubhekene nenkinga la, kufanele ukhulume uqonde ngqo kumuntu othandana naye. Le nkinga yakho ikabili, mhlawumbe nje akabalekeli amaphoyisa kodwa ubalekela wena futhi kusengenzeka ukuthi ubalekela wona amaphoyisa. Singeke salibalekela iqiniso lokuthi uma amaphoyisa efuna ukumbopha angambamba ekuseni futhi nje le nkinga dadewethu obhekene nayo ikushiyisa umbuzo othi aseke afika yini amaphoyisa lapho nihlala khona nobabili noma le nto yamaphoyisa uyizwa ngaye nje. Kubuhlungu ukubona umuntu othandweni ecasha ngesithupha.