SIYABUFUNA UBUNIKAZI BEMISAKAZO YETHU
YIQINISO ukuthi abalandeli abaningi bemisakazo bayathanda ukuzibona benobunikazi bomsakazo abawuthandayo. Kuze kwedlulele kwesinye isikhathi kufike nakubasakazi imbala nokuyikho okwenza isikhathi esiningi uzwe umlaleli egcwele enkulu indumalo uma umsakazi engamenzanga wazizwa njengobasi (umlaleli) wakhe (umsakazi).
Selokhu kwaba nezinkundla zokuxhumana nje, abalaleli sebevele bamnaphaze kalula umsakazi uma engazange abamukele ngendlela abebefisa noma belindele ngayo. Inkinga nje la iyodwa, wukuthi sifisa ubunikazi singabalaleli.
Kuba yinto efanayo uma bevakashele lapho kusakazelwa khona bezithola bengamukeleki ngendlela abebefisa ngayo, bawugxibha nxa zonke umsakazo. Eqinisweni nje size sikhohlwe singabalaleli ukuthi izinhlobo zemisakazo zehlukene njengoba uthola amapublic, Commercial namacommunity Radio station.
Amacommercial asebhizinisini lokwenza inzuzo ngaphezu kokunakekelana nezimfuno zomlandeli ezingahlangene nokuthuthukisa umsakazo ikakhulukazi ngasohlangothini lwezimali. Kule eminye emibili sinalo ilungelo lokungenelela ekushintsheni indlela okwethulwa ngayo izinhlelo, noma ukungenelela ukuqondisa ingqikithi yohlelo.
Kungenzeka esikufunayo kube ngokugxile ekuthuthukiseni umphakathi nakuba kungewona umgomo ozimele walowo msakazo.
Ngeke-ke uthi unalo leli lungelo kwezenza inzuzo. Bazokulalela phela uma uwuphosa umbono njengoba siphila ezweni lenkululeko kodwa kabaguquki ezimiselweni zabo.
Yingenxa yezizathu zalolu hlobo uzwa abaphathi bamaPublic namacommunity besukumela phezulu uma kukhona ukungagculiseki ngohlelo oluthize.
Kwezinye izikhathi baze besabise nangeziteleka impela abalandeli bomsakazo nokuyinto engeke yabasiza ngalutho esiteshini esizimele, senzuzo.
Ubunikazi-ke kithina balandeli busho ukukwazi nje nokufinyelela esiteshini, ubone lapho kusakazelwa khona. Yingakho imisakazo eminingi uyifica inamafasitela amakhulu ukuze uma sivakashele khona sikwazi ukubona okwenzeka ngaphakathi ngisho noma singezukungena nhlobo phakathi estudiyo. Umuntu obevakashele emsakazweni uba ngohlukile.
Zikhathi zonke nje uma ngile kwelakithi, kunensizwa engakhohlwa wukuthi yatshelwa nguselby Mkhize wokhozi FM ukuthi uyayithanda ngesikhathi bevakashele emsakazweni. Yigugu leli ayoze ashone nalo emgodini.
Ngikuthokozele okwenziwe yigagasi FM lethula indawo entsha elizosakazela kuyo ezinye zezinhlelo ikakhulukazi ngezimpelasonto eshaka Marine World. Le ndawo ihanjelwa kakhulu ngabaphuma ngaphandle kwetheku nokuzosho ukuthi igagasi FM lizozimaketha nakubantu abebengazi lutho ngalo.
Nendawo okubekwe kuyo le studiyo inhle ngendlela eyisimanga njengoba ungenela kubo uma ungena kule ndawo. Bekuyinkinga phela ukuvakashela lo msakazo njengoba uzinze le emhlanga, manje sesizozibonela bukhoma.
Nakuba vele ungaphansi kwaleyo esithi isungulelwe ukugaya ukheshi kodwa nawo usengowethu njengoba sishilo ngenhla.
Uyabona nje okhozini FM olusenkabeni yetheku uke ufice kuminyene utshumo efasiteleni lakhona, abantu beyozibonela ziphenduka.
Kusuke kungekho lutho olutheni olwenzekayo kodwa nje ukuxhumana kwabalandeli nabasakazi noma nezisebenzi nje zomsakazo kuyinto enkulu. Siyalihalalisela igagasi FM ngokuphumelela ukwethula lezi zindlu ezintsha zokusakaza.
Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali. Instagram: @zowakha Facebook: Zowakha Mbatha Twitter: @Zowakha zowakha@ilanganews.co.za