SIVULA AMEHLO ABACULI:
manzi, bakhuthazwe wukuthi uma sebebheme izidakamizwa noma bejovwe ngazo bayapilingana eziteji kusangane izihlwele.
Uma sibheka izinga lokushona kwabaculi bakithi kuleli, iningi labo lithathwa yizifo eziphathelene nalezi zinto esizibale ngenhla.
Singababala kuphele iminwe abaculi bakithi abathathwe yizifo ezeyamene nezinso, ukubhema, namahabulo. Kubalulekile ukuba sikhuze singapheli amandla yize kwehla kabuhlungu lokhu esikushoyo. Kungcono abantu baziphonse emlilweni bekhuziwe kunokuba bakhale ngathi ukuthi sasithuleleni.
Abesilisa baba nenkinga yokuxegelwa ngoziphu kwazise kule ndima uma ungumculi isifazane siyaziqathakela. Badideka laphoke abaculi bebona amampentshisi eziwela phezu kwabo.
Kababe besabheka ukuthi lawo mampentshisi abolile yini noma akahle, baya bephaphatheka. Kuba buhlungu umculi eseboqoke edabukisa noma esehlala ehlinile sengathi udle okumuncu enziwa yizinhlungu asuke ezizwa. Okubuhlungu wukuthi noma abaculi bangaba yizinkulungwane akekho ozothatha isiphiwo somunye.
Enye into esiqede abaculi abangayinakile, yizimbiza ezenziwa ngamakhemikhali, ezenziwa ngabantu bethi bakhaliphisa abesilisa nabesifazane. Uthola umculi ezixina ngezimbiza zokuchatha aze amelwe yizinso kuthi lapho esefika esibhedlela bangabe besamsiza ngalutho odokotela.
Kasisho ukuthi zonke izimbiza ziyabulala kepha kumele kuqashelwe ukuba kungabi yinsakavukela umchilo wesidwaba kungayiywa nakodokotela bahlolwe.
Nabesifazane bayakwenza lokho, abanye bazigquma bezigqumile ubabone sebeyobuke iziqhomo kube njeya. Sithi asikusho konke lokhu ngoba uma sekudaleke umonakalo kusuke kungasekho ukubuyela emuva. Ezinye izinyanga zincoma kwasani zizifunela imali, kukubona abaculi ukuba bazinakekele.
Abazinakekele abaculi, imindeni yabo iyabadinga, bangasanganiswa yimisindo yabantu bebabaza ukuthi bayabathanda (kazi lukalwa ngani futhi kanjani uthando lomuntu). knowledge.simelane@ilanganews. co.za