NATHI BAZALWANE MASIBHUKULE
MHLELI: Ngaze ngiphatheke kabi kuleli viki mayelana nokutholakala komuntu elahliwe endaweni okuthiwa yisethethe, Kwadukuza, eduze kwesitobhi esibizwa ngokuthi isesondweni.
Lo muntu kugqama ukuthi ubesenesikhathi abulawa, esengamathambo nje kuphela. Ngilimale kabi emoyeni ngafisa ukwazi ukuthi sinabefundisi abelapha abantu nabenza izimangaliso la ezweni esikulo, kungani ukufa komuntu singakuhlaseli khona ngalezi zimangaliso esiziphiwe ngunkulunkulu.
Ngumfundisi osiza abantu ekulimaleni, ekuhambeni ngezinqola zabangakwazi ukuhamba, uthandazela umuntu avuke ese- sondele ekufeni nokusiza umuntu ekutholeni umsebenzi kodwa ukufa kwabantu kuyaqhubeka ezweni esikulo ube uthi wenza konke lokhu okungenhla?
Usathane udansa kanjani ezweni likankulunkulu thina sibe sihlobene naye, sizibiza ngabazalwane, ngabasindisiwe noma ngabakholwayo?
Njengoba kufa abantu ezindaweni esikuzo yingoba ingekho yini indlela negiya likankulunkulu esingadonsa ngalo silwe nalobu sathane obenzeka ezweni lethu na?
Kasinakuhlangana nje siyokhuleka endaweni yesigameko la kusuke kutholakale khona umuntu noma ingane ibulewe yalahlwa khona?
Isicelo sami kubazalwane wukuba sikhulekele lapho okusuke kutholakale khona umuntu ebulewe ukuba ababulali batholakale noma kanjani, nengane elahliwe unina atholakale.
Unkulunkulu ukhona, uyaphila, konke okwenzeka ezweni lakhe angakuthandi ulindele thina esizibiza ngabakhe ukuba kube nesikwenzayo ukumlekelela ekuqedeni lobo busathane.
Nokubanjwa kwalesi salukazi ebesidayisa ngezingane ezincane ezineminyaka eyisi-6 neli-10 kungilimaze kabi emoyeni.
Nkosinathi R. Ziqubu, KWADUKUZA