Uzifela "ngohlanya" lwethe Queen
UBONGA usteve “Mphathi” Komphela ongumqeqeshi wekaizer Chiefs umohau Mokate wemaritzburg United ngokumethemba emsayinisa inkontileka yokugijima kwi-absa Premiership ekubeni ebeyibambe kwi-orbit College ebigijima kwisouth African Football Association (Safa) North West ABC Motsepe League.
Lo mdlali uthi ngeke ayikhohlwe iteam of Choice ngokumethemba njengoba ebebizelwe kwibafana Bafana ebidlala kwiCosafa Cup muva nje enorth West. Umokate udabuka ekoster, erustenburg, enorth West. Udlalele ikoster Home Stars ebigijima kwisab League, imadike nedurban Stars abebedlala esigabeni esifanayo. Udlulele kwirustenburg Sea Idols yona ebigijima kwimotsepe League asuke kuyona wajoyina ihighbury yasebhayi nayo ebidlala kulesi sigaba.
Udlale kuyona isigamu sesizini wayodlalela i-orbit College. Uzame inhlanhla kwiteam of Choice ngowezi-2014 ngenhlanhla walidonsa iso lethimba labaqeqeshi ebeliholwa nguKomphela.
Lo mdlali ufunde emoitshoki Mofenyi Primary nasenphe-bana High. Ngonyaka wezi-2009 ubemele inorth West emidlalweni yemetropolitan ebibanjelwe ethekwini. Ingxoxo YELANGA Langesonto nomokate ngempilo yakhe yaNgaphandle kwenkundla ihambe kanje:
ILANGA Langesonto: Awuzichaze ukuthi ungumuntu onjani.
Mokate: Ngiwumuntu onomoya omuhle ohlale efuna kuhlekwe. Ngisho kukhona umdlali ofikayo ekilabhini yimina engiba wumngani wakhe kuqala.
Angizwani nodlame futhi ngiyabahlonipha abantu kungakhathaleki ukuthi umncane noma umdala. Ngikhuliswe ngenhlonipho ekhaya.
ILANGA Langesonto: Basekhona abazali emhlabeni?
Mokate: Ngebhadi unyaka wezi2014 kangiwukhohlwa nhlobo. Ngishonelwe ngumama ngasekupheleni kwawo. Ushone ngisajabulela ukujoyina iteam of Choice phakathi nonyaka.
Ubaba yena usekhona kodwa ngicela ukuligodla igama lakhe. Sibathathu esivundle esiswini sikamama. Kufike kube yimina, utsepo no-omphile.
ILANGA Langesonto: Ukhona omunye umdlalo owukhonzile ngaphandle kwebhola?
Mokate: Ngizifela kakhulu ngekhilikithi. Bengidlala yona nonobhutshuzwayo.
Ngikhumbula ngoba ngowezi-2009 bekumele ngikhethe ukuthi ngiyodlala ikhilikithi ecape Town noma ngiya kwimetropolitan ethekwini. Kulapho ngiqome khona unobhutshuzwayo ngokusemthethweni.
ILANGA Langesonto: Ngakube usugcagcelwe?
Mokate: Angikashadelwa. Ngihlela ukuthuma abakhongi bangiyele kubo kwesinqandamathe sami efree State. Ngihlala naso escottsville nendodakazi yethu uhope. Ngijwayele ukuzihlalela nabo isikhathi esiningi uma singadlali.
ILANGA Langesonto: Usichitha kanjani isikhathi sakho?
Mokate: Ngihlala nomndeni wami noma ngizule nabalingani bami siye emidlands Mall. Sengikhathele yiscottsville ngoba ngihlala kwelinye lamafulethi khona.
ILANGA Langesonto: Uhamba ngaluphi uhlobo lwemoto?
Mokate: Angikakabi nayo imoto, kodwa ngizifela kakhulu ngebmw.
ILANGA Langesonto: Yimuphi umdlalo owuchungechunge owukhonzile kumabonakude?
Mokate: Ngithanda i-the Queen engena ngemuva kwesibaya kwimzansi Magic. Ngichazwa nguBrutus (oyisibhedi salo mdlalo) nokgosi.
ILANGA Langesonto: Ukhona ezinkundleni zokuxhumana?
Mokate: Ngikhona kwifacebook nakwi-instagram. Ngingahlala kanjani ngingabi bikho kulezi zinkundla ngibe ngisebenzisa isamsung A 7.
ILANGA Langesonto: Yiluphi uhlobo lomculo olukushaya ngaphakathi?
Mokate: Ngithanda umculo wokholo. Ungishiya ngibusisekile emphefumulweni.
Ngikhonze kakhulu umculo kaOmega Khunou nokabenjamin Dube.
ILANGA Langesonto: Iyiphi iki- labhu okhule uzifela ngayo kuleli naphesheya kwezilwandle?
Mokate: Bengithanda ikaizer Chiefs lapha eningizimu Afrika kanti phesheya ngizifela ngemanchester United yase-england.
ILANGA Langesonto: Likhona izwe osuke wavakashela kulona?
Mokate: Angikaze ngiphumele ngaphandle kwaseningizimu Afrika. Ngihalela ukuya eholidini erio de Janeiro ebrazil.
ILANGA Langesonto: Ubumatasa ngani njengoba kade kusahlatshwe ikhefu kwipremier Soccer League?
Mokate: Ngivele nganquma ukuyozihlalela ekhaya nomndeni wami. Bese ngiwukhumbule kakhulu. Ngijabule kakhulu njengoba ngihlale nawo amasonto amathathu.
ILANGA Langesonto: Lukhona uhlobo olukhethekile olusebenzisayo ezimpahleni zokugqoka?
Mokate: Ngigqoka noma yini engilinganayo. Angiyena umuntu obhekisisa amagama. Angizwani nempilo ewubukhazikhazi.
ILANGA Langesonto: Yiliphi idolobha olithandayo phakathi kwerustenburg, ibhayi nomgungundlovu?
Mokate: Ngithanda kakhulu leli ongalibalanga, itheku. Nokho-ke umgungundlovu sengiwujwayele futhi ngiyakujabulela ukuhlala kuleli dolobha yize kunamakhaza ashubisa umnkantsha ebusika bese likhipha umkhovu etsheni ehlobo.
ILANGA Langesonto: Uhlele ukwenzani ngemuva kokubeka amakhokho ethala?
Mokate: Ngihlela ukuphothula izifundo zami e-orbit College. Ngifuna nokwenza izifundo zokuqeqesha ukuze ngisize intsha ngolwazi lwebhola. Eqinisweni nje ngeke ngiphume ebholeni.