Kushone abalandeli kowechiefs nebucs
Kulimale kabi abali-19 kubalwa nengane
Ebika esefnb Stadium, egoli
IFU elimnyama kushona abalandeli ababili emdlalweni wecarling Black Label Champions Cup onqotshwe yikaizer Chiefs iguqisa i-orlando Pirates ngo-1-0 wegoli likabernard Parker elingene ngomzuzu wesi-9 izolo ngomgqibelo ntambama EFNB Stadium, egoli.
Lo mdlalo uqale isimo sesimuncu kubalandeli abasibone senzeka bukhoma esangweni elingunombolo J. Lapha abalandeli ababili bashone emuva kokugxobana kwabathandi bala makilabhu abebephume ngobuningi babo ukuzowabuka eshukana. Kulimale kabi abalandeli abali-19 kubalwa nengane. Lezi zindaba ziqinisekiswe ngamaphoyisa emuva kwalo mdlalo. Athe asayiphenya imbangela yalo mshophi.
Kusolakala ukuthi lokhu kugxobana kudalwe wukudayiswa kwamathikithi angombombayi enkundleni. Leli shobolo kaliqali ukwenzeka njengoba nangowe-1991 kushone abangama-42 la makilabhu ebhekene e-oppenheimer Stadium, e-orkney, kwathi ngowezi-2001 kwadlu- la emhlabeni abangama-43 e-ellis Park.
Uma sesibuyela emdlalweni, ichiefs iwuqale ngegiya eliphezulu icindezele kubonakala ukuthi ibucs ithwele kanzima.
Akumangalisanga uma ichiefs ithola igoli ngomzuzu wesi-9 ugustavo Paez enika uparker umshoshaphansi webhola akaze ananaza walibhajiswa ezintanjeni.
Ichiefs kuvele kwangathi ithelwe ngezibonkolo ifika ifikile emapalini ebucs. Udonga lwebucs lubukeke luthwele kanzima ukumaka uparker nopaez abebetholana ngendlela eyisimanga. Nokho bebesizwa nguhendrick Ekstein obezicanasela esiswini sebucs eyivula ithi izama ukuvala.
Ngesiwombe sokuqala ichiefs bekufanele okungenani iye ekhefini ihamba phambili noma ngamagoli amathathu. Ibucs isizwe ngusiyabonga Mpontshane obevimba amabhola anzima.
Kuyiwe ekhefini u-itumeleng Khune ongunozinti wechiefs kungekho mabhola anzima awavimbile.
Ngesiwombe sesibili umdlalo wehlelwe wumfutho kwazise bese kwenziwa izinguquko eziningi. Ipirates, umdlalo unemizuzu eyisihlanu ubuye ekhefini bese yenze izinguquko eziyisihlanu, ichiefs isashintshe kanye. Phela lo mdlalo uthathwa njengowabalandeli njengoba kuyibo ababophela isikimu, benze uhlelo abafuna ludlalwe baphinde benze izinguquko.
Izinguquko ezenziwe yibucs zivele zasixova isikimu kwangabonakala ukuthi idlala luphi uhlelo. Ngomzuzu wama-80 ipirates isebenzise okokuqala ngqa emdlalweni ukhune ngesikhathi ubernard Morrison ethumela inguzunga yeshodi engaphandle kancane kwebhokisi elikhulu ukhune wayichithela ku-ayanda Gcaba wathi uyingqofela enethini yangqubuza ipali. Emuva kwalo mnyakazo bese zicindezelene kodwa lagcina ngokuduma liyithathe ibucs.
Zilokhu ziqine njalo izinsolo zokuthi umilutin “Micho” Sredojevic waseserbia angase ashaye ibuya ekucijeni ibucs emuva kokuba lo mqeqeshi edinsile umsebenzi kwi-uganda ecikwa wukungaxazululwa kwezinkinga ezithinta amaholo.
Umkhumbi webucs ubukeka ulokhu ucwilile ngaphansi kukakjell Jonevret wasesweden ongakaqedi ngisho izinyanga eziyisi-6 kule kilabhu.