Mazibhekwe izinkinga ezihaqe itheku
NGEMUVA kwezigemegeme zakamuva, kunzima ukuthalalisa uma uyisakhamuzi sasethekwini namaphethelo, noma sakwazulu-natal ngisho ngabe ukuziphi izinkalo zezwe.
Kusukela ezigamekweni zokubulawa kwabantu ezenzeka ehostela laseglebelands ezilokhu ziqhubekile, kuya kwimbedumehlwana yokubanjwa ngobhongwana kukamasipala weTheku, isimo sikhombisa ukungagwinyisi mathe kuleli dolobha elidume ngokuba ngungqa phambili kwezokuvakasha nokungcebeleka eningizimu Afrika.
UKUBULAWA KWABANTU EGLEBELANDS
Njengoba kungakapholi maseko kuhlale ikhomishana kamarumo Moerane ephenya ngezigameko zokubhuqwabhuqwa kwabantu kulesi sifundazwe, okusolwa ukuthi babhuqwa yizinkabi ezinkanise eglebelands, umuntu ubengacabanga ukuthi kuzoke kuthi ukuma ukubulawa kwabantu.
Nokho lokhu kubukeka kungabethusi nakancane oshayasbhamu njengoba bephinde baqhubeka nomsebenzi wabo, bebulala amalunga amabili omphakathi wakuleli hositela osekwenze isibalo sababulewe senyukela kuma-91 kusukela ngonyaka wezi-2014. Kusobala ukuthi inkulu inkinga ebhekene nezokuphepha kuleli dolobha lasethekwini njengoba kunukeka namaphoyisa ukuthi anesandla kulezi zehlakalo zokubulawa kwabantu.
Kuyisimanga ukuthi edolobheni elikhulu njengetheku, elinamaphoyisa akwasaps namaphoyisa kamasipala wetheku, indawana encane, okungamabhilidi ambalwa nje eglebelands, ingafukamela ababulali iminyaka kungatholakali noyedwa ajeziswe. Sikholwa ukuthi luningi ulwazi olufukanyelwe ngosopolitiki nezikhulu zamaphoyisa ngalolu daba.
Okumele kukhathaze kakhulu izakhamizi zaKwazulu-natal ngukukapakela kwalolu dungunyane kwezinye izindawo esifundazweni nasezweni lonke, okungagcina kwenze isifundazwe inkundla yempi nokubulalana kwabantu okungalawuleki.
Sisibona singaba yisixazululo isiphakamiso sikangqongqoshe wamaphoyisa umnu Fikile Mbalula sokuthi amaphoyisa angahlali eziteshini ezizodwa isikhathi eside kodwa ashintshe izindawo ukuze kugwenywe ukujwayelana kwawo nomphakathi okugcina kwenze ajwayelana nezigebengu imbala. Uma kungalethwa amaphoyisa akwezinye izifundazwe kule ndawo, sinethemba lokuthi singawubona umehluko omkhulu.
UMDONSISWANO KUMASIPALA WETHEKU
Olunye udaba olusematheni kulezi zinsuku olwemibiko yomdonsiswano ngaphathi kwiziphathimandla zikamasipala wetheku. Lokhu sekuholele ekubeni kumiswe noma kuxoshwe izikhulu eziningi kulo masipala ezilawula iminyango ebalulekile okubalwa kuwona owezomthetho, owezempilo, okagesi nowezamapaki, ezemdlalo nokungcebeleka.
Zonke lezi zikhulu yizona ebezishayela lo masipala ngesikhathi uthola umbiko ohlanzekile womcwaningimabhuku ekupheleni konyaka wezimali wezi-2016. Bekungokokuqala ngqa ukuba lo masipala uthole umbiko ohlanzekile. Mini-ngi nemiklomelo ewolwe yileli dolobha ngapha-nsi kobuholi balezi zikhulu.
Kuze kube manje akuzwakali kahle ukuthi ezinye zalezi zikhulu zimiselweni noma zishiyelani. Kumele isukunyelwe kusekusha indaba yokubhimba kwezinto ngoba ukufadabala kweTheku kusho ukufadabala kwesifundazwe sisonke, okungasho ukulimala nokukhandleka komnotho wezwe.