AMAZULU FC ASEHLANZE NGEDELA NGOMGADLI
AMAZULU FC asephonse ithawula ngobongi Ntuli ongumgadli wemamelodi Sundowns ophila ngokubolekiswa selokhu ajoyina amabrazilian.
Usuthu luzodlala nembabane Swallows yaseswaziland kwi- semi
final yesibili kwiprince Mangosuthu Legacy Cup namuhla ngesonto ngo-11h30 olundi Regional Stadium, ondini. Kwisemi final yokuqala kuzotholana phezulu ibloemfontein Celtic nesikwati sasezululand. Abazonqoba bazobhekana kowamanqamu ngo-15h30.
Ulunga Sokhela oyisikhulu esiphezulu sosuthu utshele
ILANGA Langesonto ukuthi sebehlanze ngedela ukuthi bazokwazi ukuthola untuli kwisundowns, emile kwelokuthi iyamthengisa kule sizini, kayibolekisi ngaye. Idowns ilwela ukubuyisa imali ethenge ngayo lo mgadli kwilamontville Golden Arrows kwazise iyaphela inkontileka yakhe ngonyaka ozayo.
Usokhela uqhube ngokuthi unelikhulu iqholo lokuthi ezakhe ngeke nangengozi zibuyele esigabeni sikanational First Division (NFD) eziphume kusona ngokuthenga ilungelo lethanda Royal Zulu lokudlala kwi-absa Premiership.
Uthi seluqine ngokwanele manje ukhakhayi kubona (beyizikhulu) ukuqikelela ukuthi bathatha izinqumo ezizoyisa le kilabhu phambili.
Uthi kule sizini bazolwela ukuzinza esigabeni esiphezulu, egcizelela ukuthi kabakufuni ukubalwa namakilabhu azodliwa yizembe. Uthi sekusele kancane ukuthi bavale ibhuku labo lokusayinisa abadlali ezeseka ngokuthi sebeneme ngesikwati abanaso.
Uduncan Lechesa oyisekela lomqeqeshi kwiceltic, uthi bafike kulo mqhudelwano bephethe amasheke avulekile ukusayinisa abadlali bezululand abazosika ukhasi kulo mqhudelwano okuhloswe ngawo ukuhlonipha umntwana umangosuthu Buthelezi ongumshana womsunguli wosuthu, isilo usolomon. Kungenwa ngoR30 abadala kanti izingane ngur10.