UREV BHENGU UBENOGCOBO LUKAMOYA ONGCWELE
Impilo karev Nicholas Bhengu - Ingxenye 2
SINGAKAQHUBEKI nengxenye yanamuhla yempilo yaleli qhawe, ILANGA Langesonto liyaxolisa kubafundi ngokubika ukuthi unkz Dawn Bhengu sekusele yena yedwa kubantwana bakarev Bhengu.
Lokhu lalikuthole ngemithombo osekubonakala ukuthi yashaya eceleni. Okungukuthi kalibange lisawubuza lowo mbuzo ngenkathi lixoxa nonkz Bhengu. Empeleni inkosazana kamfu Bhengu eyendele kwavilakazi, enew Germany, uruth, obuye abizwe ngelithi Waxy, usaphila.
INDIMA YAKHE EVANGELINI
Ngowe-1931 ungene wathi shi emsebenzini wenkosi evangela ebandleni ifull Gospel Church ngaphansi kukamfu Job Chiliza, kamuva owasungula i-african Gospel Church. Kusukela lapho-ke uye washa amashushu ngokushumayela.
Ube nephupho lokuba i-afrika ibuyele kunkulunkulu, enza izimvuselelo ezinkulu kulo lonke leli zwe lapho bekuphulukiswa kuzo abagulayo. Ubengaphumuli, elihamba lonke leli laseningizimu Afrika ngendlela efuze ekamphostoli upaul, ephokophelele into eyodwa: ukuba abantu basindiswe.
Kolunye lwezinkambo zakhe zokushumayela, elibhekise engxenyeni yaleli zwe manje isiyisifundazwe ilimpopo, kwashona umntwana wakhe womfana owabe ebuthaka.
Umfu Bhengu waphambukela epulazini lebhunu wacela ukumngcwaba khona umntwana. Wathulula i- trunk elalinezimpahla zakhe zokugqoka wayingcwaba ngalo indodana yakhe.
Indodakazi yakhe, udawn, uthi uyise ubeyaye ancokole ngokuthi ungowokuqala ukungcwaba ngecasket njengoba kulezo zinsuku kwakwaziwa ibhokisi lomngcwabo elenziwe ngepulangwe kuphela, engakabi khona amabhokisi ohlobo lwe- casket.
Ngokusho kukadr Elijah Maswanganyi, webandla ichrist Is the Answer Global Ministries, encwadini esihloko sithi WE SERVE A BIG GOD, eyiqoqo lezintshumayelo ezihlanganiswe ngudr Fred Roberts, ohola ibandla idurban Christian Centre, urev Bhengu kungathi uphile ngaphambi kwesikhathi sakhe.
“Ube nesibindi, ekhuluma aqonde ngqo, esho lokho akucabangayo, enamathele okholweni lwakhe, futhi ehamba ngogcobo lukamoya ongcwele. Ubeqhutshwa futhi egqugquzelwa yimpilo yokuthandaza”.
Udkt Maswanganyi uqhubeka athi umfu Bhengu ubengesiye nje umshumayeli kodwa ubeyindoda kankulunkulu ebibiziwe ngempela, futhi yagcotshelwa umsebenzi wenkosi okhethekile, igalelo layo eliqhubekile kwaze kwaba yimanje.
Uphawu lweqhaza abelibambile emsebenzini wenkosi wuthando abenalo ngemiphefumulo yabadukileyo, futhi izimvuselelo zakhe bezihambisana nezibonakaliso nokuphenduka kwezindimbane zabantu abebephulukiswa, kanjalo nokusungulwa kwamabandla okusabalale neningizimu Afrika yonke.
U-dkt Fred Roberts ongumsunguli nomholi webandla elikhulukazi idurban Christian Centre yena uphawula athi nakuba ngesikhathi esakhula umfu Bhengu isimo sasiphika ukuba athole amathuba amahle empilweni, nokho ukhule waba ngumuntu obalulekile kakhulu waze waziwa ngokuthi ungu”billy Graham” waseningizimu Afrika omnyama, ngenxa yezimvuselelo zakhe ezinkulu abezenza.
Imibiko yabezindaba ngesikhathi abeshumayela ngaso urev Bhengu ithi izinkonzo zakhe zemvuselelo bezivamise ukulandelwa wukuncipha kobugebengu kuleyo ndawo ezikade zenzelwe kuyo. Kulezo zinkonzo bekuyinto evamile nengethusi ukubona otsotsi bephenduka bebuyisa impahla abayintshontshile.
Lokhu kufakazelwa ngumbiko wephephandaba elihlonishwayo emelika, ITIME oshicilelweni lwalo mhla zingama-23 November 1959, othi, “Elinye igalelo elinamandla lenkolo yobukrestu e-afrika ngelomzulu oneminyaka engama-50, osho ngamadevu ancwelwe kahle afana nomugqa obhalwe ngepeni lomsizi, ofaka izibuko ezinefulemu lophondo, ongenqeni ukunxenxa izigebengu ukuba zilethe kuye izikhali zazo qede zizinikele enkosini.
Uma eseshaye isudi yakhe efana nalawo afakwa osomabhizinisi, esesiteji esakhiwe ngamakesi, umfu Nicholas Bhengu uye asho ngomoya ophansi ngesizulu athi: “Ubugebengu abukhokheli lutho”. Bekuba nokunyakaza esixukwini sabantu abalapho, ikakhulukazi intsha egunde isistayela se- ducktail, egqoke ama- jean namajakhethi ayi- safari. “Nikelani izikhali zenu nani qobo lwenu kunkulunkulu”.
Ngowe-1977 umfu Bhengu uhlonishwe yi-soul Winner Institute of Jersey City enew Jersey kwelaseMelika ngokuba yiworld’s Greatest Black Soul Winner” ngomsebenzi wakhe awenzele unkulunkulu, ibandla, nabantu bakubo.
*Bheka incwadi ekhasini 19
bonginkosi@ilanganews.co.za