ZOWAKHA MBATHA
IHHEEE izinto zimane ukwenzeka Nkombose kababa! Kuke kwahlasela isishingishane ezindlini zokusakaza KWASABC phambilini kwanyakaza yonke into, nawo wonke umuntu. Kushintshwe imigomo obekwaziwa ukuthi kuphilwa phezu kwayo kwazamazama imboni yonke yezokusakaza. Hheyi siyenzile indaba isivunguvungu sakwamotsoeneng (Hlaudi).
Kuningi khona obekukushiya ukhexile ngezinye izinqumo zakhe kodwa makangaqanjelwa amanga, kukhona bo okube nomthelela omuhle akwenzile. Ngibona inkinga enkulu nje kube yindlela abethatha ngayo izinqumo ubaba uhlaudi. Emuva kokuzinika ithutshana ngigxumagxuma eziteshini eziningi ngempelasonto edlule kungicacelile ukuthi impela umbuso wakhe usuqunjwe phansi ngokugcwele.
Yiqiniso elimile ukuthi abaculi bebesazozuza ngesinqumo sika-90% wodumo. Isinqumo sokwandisa umculo wakuleli odlalwa emoyeni sisho ukuthi iningi imali ezophelela kuleli esikhundleni sezigidigidi zamarandi ezigcina ziya kwamanye amazwe. Ama- royalty akhokhelwa abaculi, ababhali nabaqambi bezingoma, izinkampani eziqopha noma zisabalalise imikhiqizo kuthenjelwe kuwona kule mboni. Ubaba uhlaudi ufike nombono omuhle, mhlawumpe inkinga kube yindlela ofinyelele ngayo ezisebenzini nakithina abalaleli.
Kucace zisuka nje ukuthi kukhona nezinye izisebenzi zasesabc imbala ebezingaseseki lesi siphakamiso. Kuzwakale zisuka abanye bezwakalisa ezindaweni ezahlukene nasemithonjeni yezindaba imbala ukuthi lesi siphakamiso sibehle ngenhla. Kuthe noma sekudlalwa lo mculo kwacaca ukuthi kunabasakazi nabadidiyeli bomculo emisakazweni ( compilers) abawenzela phansi umbono kababa uhlaudi.
Lokho ubukuzwa ngohlobo lomculo abebeludlala njengoba kushintshwe ama- format ezinhlelo, kwadlalwa nezingoma ezindala ezingalalelwa nhlobo nangabalandeli bazo iziteshi. Khumbula phela ukuthi yileso naleso siteshi sinesigatshana esithize sabalaleli esigxila kubo ngokweminyaka yabo ( age bracket) ngokunjalo nohlobo lwempilo abayiphilayo ( Living Standard Measurement-lsm).
Kuthe uma le misakazo yenzela ezibini ubaba uhlaudi, kwaqala kwasabalala izindaba ezithi izibalo zabalaleli zehlile, kwathiwa inani lezikhangiso zehlile. Ngendlela nje esobala lokhu bekusho ukuthi izinto zimapeketwane ESABC. Ukubaleka kwabalaleli nokwehla kwenani lezikhangiso bekusho ukuthi isinqumo sikababa uhlaudi sika-90% siyifambu lokugcina kanti lutho. Umlaleli nenzuzo yizona zinto phela eziphambili phela emsakazweni.
Ngithe uma ngilalele iziteshi zale nhlangano kwangicacela ukuthi impela sesiphindele e-united States of America ngokugcwele njengaphambilini.
Yebo, kubalulekile ukugcina abalaleli benamathele emsakazweni kodwa kubalulekile futhi ukufundisa ngoba umlaleli ugcina ekholelwa kwanikwa khona. Baze bathi abanye ozakwethu umlaleli uyisif&*e.
Ngicabanga ukuthi ISABC kusafanele izivakashele futhi iziphakamiso zikababa uhlaudi bese bezipholisha nje kahle, bazethule kahle kubasebenzi nakithina abalaleli. Iyaphela bo imali yezwe lakithi iyonothisa amaciko akwamanye amazwe ngenxa nje yokuthi isiphakamiso sikababa uhlaudi sagcina sigxotshwe ngamabhuzu.
*Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali. Instagram: @zowakha
Facebook: Zowakha Mbatha
Twitter: @Zowakha zowakha@ilanganews.co.za