Udkt Dlamini-zuma uzofungiswa ephalamende
EZEPOLITIKI: Kuthiwa bamshoshelisa kwesokwengamela izwe
UKUQOKWA kukadokotela Nkosazana Dlamini-zuma ukuba abe yilunga lephalamende sekuqubule izinsolo zokuthi i-african National Congress (ANC) imshoshelisa ukuba abe sethubeni elihle lokuhlwitha isicoco sokwengamela iningizimu Afrika esigaqelwe ngabaningi.
Izindaba zokuthi uzofungiswa njengelunga lephalamende zizwakale maphakathi nesonto zaphinde zaqinisekiswa ngunobhala Jikelele waleli qembu, umnu Samson Mantashe, kepha wakuphika ukuthi njengoba ezofungiswa nje uphendlelwa nesikhala sokuba abe ngungqongqoshe kukhabhinethi kamsholozi.
Umnu Mantashe ucashunwe ngabezindaba ethi: “Thina njengeqembu sithumela ilunga lethu esilethembayo ephala- mende bese umengameli wezwe kube nguye onqumayo ukuthi ufisa ukulisebenzisa kuphi.”
Akusafihliwe ukuthi imbangi enkulu kadkt Dlamini-zuma njengamanje, eyiqatha emphinjeni, ngumnu Cyril Ramaphosa oyiphini likamengameli. Sikusho lokho ngoba cishe bobabili izifundazwe eziningana ziyabafuna. Abanye abasembangweni ngunkz Lindiwe Sisulu ozalwa yiqhawe lomzabalazo, umnu walter Sisulu, Mathews Phosa oke waba ngumgcinimafa weqembu, wudkt Zweli Mkhize ongumgcinimafa weqembu manje, wumnu
Sithumela ilunga lethu esilethembayo ephalamende bese umengameli wezwe kube nguye onqumayo ukuthi ufisa lisebenze kuphi.
Jeff Radebe ongungqongqoshe ehhovisi likamengameli nonkz Baleka Mbete ongusomlomo wephalamende.
Udkt Dlamini Zuma uzongena endaweni kamnu Pule Mabe osanda kwesula ekubeni yilunga lephalamende kanti omunye ozofungiswa ngumnu Matthew Wolmarans oke waba yimeya yaserustenberg ovala isikhala sikamnu Brian Molefe ongaqedanga ngisho unyaka efungisiwe waphinde wabuyela kwa-eskom.
Ingqungquthela yokukhetha ubuholi beqembu evulelwe amagatsha aleli qembu izoba ngodecember egoli, kuyoqhuma nhlamvana ezinye ziyofekela.
knowledge.simelane@ilanganews.co.za