Ube yimpumelelo umkhosi womhlanga
Kuquleke izintombi ngenxa yelanga ebelikhipha umkhovu etsheni
INKINGA yokomela amanzi nelanga ebelishisa likhipha umkhovu etsheni kukholakala ukuthi yikhona okube nomthelela wokuquleka kwezinye zezintombi ebeziyingxenye yomcimbi waminyakayonke, umkhosi womhlanga.
Lo mcimbi ubuyizolo esigodlweni sesilo ugoodwill Zwelithini, enyokeni, Kwanongoma izolo.
Abezimo eziphuthumayo basebenze kanzima ukuqinisekisa ukuthi izintombi zithola usizo ngokushesha.
Okucacile wukuthi izintombi zibe nenkinga ngesikhathi zikhuphukela endaweni lapho beziyobeka khona umhlanga, okuyilapho iloli ebelithwele amanzi belimi khona.
Nokho isimo silawulekile, umcimbi waqhubeka ngempumelelo. Kulo mcimbi wokuqhuba usiko lokuhlolwa kwezintombi osuneminyaka eminingi wenziwa izintombi zithola nethuba lokuyalwa yimbube, ubhejane phum’esiqiwini.
Umntwana ucebolenkosi nguyena obehola izintombi futhi onikeze isilo umhlanga. Izintombi ebezihlobe ngezesintu bezingangozulu eya emakheni, zihuba amahubo esintu ziphethe umhlanga.
Beziqinisiwe ezokuphepha kusukela ngolwesihlanu emigwaqweni ebheke Kwanongoma kanti nasesigodlweni sembube abakwasidlodlo nonogada bebehlome beyizingovolo.
Amabhasi abethwele izintombi aqale ukutheleka esigodlweni kusukela ngolwesihlanu ekuseni. Lo mcimbi ubukeke uhleleke kangconywana kuneminyaka eyedlule njengoba besingekho isiminyaminya sezimoto. Omama abagada izintombi bebesebenza kanzima ukuqinisekisa ukuthi izintombi ziphephile futhi zinakekelekile ngezidingo ezahlukene. Lo mcimbi unedumela njengoba uheha nezivakashi eziqhamuka nakwamanye amazwe kanti ubuhanjelwe yizikhulu zikahulumeni emazingeni ehlukene, wosomabhizinisi abaziwayo nosaziwayo.
Omunye umbiko ephephandabeni ILANGA kusasa.