KUPHUME NEZANGOMA KUHLUNGELWA UMETHULI WE-OPW
BEKUMINYENE utshumo kwinhlolokhono yokuhlungela uhlelo lukabonakude oludlala kumzansi Magic lwemishado olubizwa ngokuthi yi-our Perfect Wedding (OPW), ethekwini izolo.
ILANGA Langesonto lifike abebengenele inhlolokhono bemi ngaphandle bezungeze iprotea Hotel, Edward Hotel, lapho ibiyenzelwe khona (inhlolokhono). Beliphumile ilanga lishisa bhe, kukhona abesebehleli phansi kulabo abebemi ngaphandle belinde ithuba lokungena, bebukeka sebekhathele wukulinda. Abanye belokhu beziphophotha, belungiselela ukubonakalisa ikhona lokwethula uhlelo phambi kwamajaji.
Ngaphakathi bekunendawo esahholo lapho bekuhlezi khona abanye abacishe babe yikhulu, obekucashunwa kubo abayishumi noma abayishumi nanhlanu bayohlolwa ngophrojusa, bese kukhethwa ababili noma abathathu kuphela. Labo abasuke sebedlule lapho yibo abebethola ithuba lokuyobhekana namajaji amakhulu u-unathi Msengane ongumculi ophinde abe ngumsakazi, kanye nothembisa Mdoda okunguye obeshayela lolu hlelo, OPW kodwa osethi khumu.
Okuqaphelekile kule nhlolokhono wukuthi izintombi nezinsizwa ebezingenele bezingazenyezi ngobuzona njengoba bekukhona asebeqinile, yizidudla, kukhona ngisho nezangoma okungaba ngokokuqala ukuba lolu hlelo lwethulwe u”makhosi”.
Isangoma esikhulume NELANGA Langesonto sibuzwa yileli phephandaba ukuthi uma kungenzeka siphumelela sizomelana yini nezimo zalo msebenzi, sivumele phezulu sathi:
“Abadala baya-andastenda, uma nje ubacele kahle ngeke bakunqabele, ngakho anginankinga, ngiyawufuna lo msebenzi, nginakho konke okudingeka kulolu hlelo.”
Okhulumela umzansi Magic, unkz Emaah Ngomane, uthe lona ngumlenze wesibili emuva kokuba babe nenhlolokhono ebe yimpumelelo e-east London, e-eastern Cape ngeledlule.
“Selokhu siqalile izinto zisahamba kahle kangangoba bekuminyene utshumo nase-east London njengoba ubona nalapha. Ngesonto elizayo sesiyoyiphetha egoli imbenge yalolu chungechunge lwenhlolokhono,” kusho yena.
Abesilisa bebeyidlanzana kunabesifazane kanti isimenywa ebesikhuthaza abazohlolwa bekungumbali Nkosi ongumlingisi emidlalweni kamabonakude. Silobe lapha usaqhubeka umshikashika wokuhlunga.
knowledge.simelane@ilanganews.co.za