LIZOGAWULA IZEMBE KOWE-IDOLS SA
KUZOBAKHONA ukukhala nokugedla kwamazinyo kukhethwa abayishumi abazosala emncintiswaneni womculo i-idols SA.
Lo mncintiswano okhonjiswa kwimzansi Magic (161) njalo ngeSonto ngehora lesihlanu ntambama, namhlanje uzoshiya abantu abaningi bebambe ongezansi ngokuthola ukuthi ngobani abazongena kwi-top 10 nabazokhala ngaphansi kuhle kwentshebe yakwaMashu.
Imvamisa kuyaye kufike kulesi sigaba sezikhona izinkomba zokuthi ngubani ongahle athathe isicoco kodwa kulokhu kubukeka kunzima, sengathi izinto zishube kakhulu. Kuzokhumbuleka ukuthi kumaseason edlule alo mncintiswano izinto beziqala ukukhanya ngemuva kokukhethwa kwe- Top 16, okuyilapho izinto ziqala khona ukushuba impela.
Kulapho siqale khona ukubona abanye beshintsha, bekhipha amangwevu. Abanye abangene esigabeni se- Top 16 besingazitsheli nokuthi bazofinyelela kuyo. Kuyiqiniso futhi ukuthi unyaka nonyaka kuba khona ozovele angabi nayo i” vava voom”, kwazisholo usomizi.
Kulokhu sibona ubasetsana Kolwane (19), ngeledlule ocule ingoma kazahara esihloko sithi umthwalo - cha kanginanxa nale ntokazi kodwa kukhona impela okushodayo kuyona.
Urandall Abrahams, oyijaji elikhulu ubeqinisile impela uma ethi ubuso bayo le ntokazi buthule nje, kanti nendlela abebeyigqokise ngayo ivele yayenza (le ntokazi) yabukeka ineminyaka elinganiselwa kwengama-30 noma ngaphezudlwana.
Mina ngokwami bengingacela kulabo abaphophotha, balungise amakhanda, futhi bagqokise abancintisanayo ukuba bayizame ngenye indlela le ntokazi. Kodwa nabo abancintisanayo kakufuneki bavumele ukwenziwa into abangazethembi ngayo ngoba lokho ku- ngadala ukuba umuntu angabi nakho ukuzethemba ngisho esephambi kwamajaji.
Njengona ngisho ukuthi indlela le ntokazi ebigqokiswe ngayo ngeledlule ngike ngazithola sengibheka imininingwane ehlizekwe ngabama-idols, ngifuna ukuthola ukuthi ngempela ngempela mingaki iminyaka yale nkosazana. Ubukhona kimi umcabango wokuthi ikhulile, ingene ngephutha kulo mncintiswano.
Okunye engifisa ukukugcizelela wukuthi abantu mabenze isiqiniseko sokuthi bayavota, hhayi ukuthi bakhulume nje kuphela bagxeke uma umuntu abebemfuna engasaphumeleli. Sengiphetha nje, ngigcizelela ukuthi abantu mabazifundise ukuvota.