ZOWAKHA MBATHA
KUHLALE kuyintokozo zikhathi zonke ukubona ukuthi izinto esizicubungula kule ngosi ziyakhulisana ngezindlela ezahlukene. Lokhu sikubona ngemiyalezo esiyitholayo nasezindaweni nje esihlangana kuzo nabanye abathanda le mboni yezemisakazo, bencoma noma bevula izingxoxo ngezemisakazo kuleli. Kungalesi sizathu-ke sinqume ukushicilela lo mbono womunye wabafundi BELANGA Langesonto olandela le mboni:
MHLELI: Zisishiya sinkemile thina bathandi bemisakazo ezinye zezinqumo ezithathwa ngabanye abaphathi. Nakuba kungebona bonke abasimangazayo kodwa okubalulekile wukuthi basilalele labo abaphethe uma sivungama.
Ukungabi nalwazi olunzulu komphathi siteshi ngomsakazo yikhona okwenza kugcine kwehla isibalo sabalaleli balowo msakazo.
Kunengcindezi enkulu manje efakwa yizinkundla zokuxhumana nokuphosela abaphathi beziteshi enkulu inselelo. Uzoqaphela ukuthi muva nje abaphathi sebehambisa phambili ukufaka osaziwayo emsakazweni. Kakuyona into embi lokhu uma ofakiwe engena khaxa nasekusakazeni.
Make sibheke nje imisakazo emibili emikhulu okuyimetro nokhozi FM.
Imetro FM esakaza ngesingisi ngiyibona ihamba phambili kwintsha njengoba kunenqwaba yayo kulezi zinsuku ethanda lolu limi. Inkinga wukuntula ulwazi netwetwe kubaphathi njengoba begcina bewola le nqwaba yosaziwayo esikhundleni sabasakazi. Kuhle ukuba usaziwayo ahambisane nomuntu onekhono lokusakaza uma yena engaphiwe ngalapho. Okwakhe nje kungaba wukugxila kwizingxoxo ( interviews) nalabo abasuke beyizivakashi.
Lo msakazo wenza elikhulu iphutha udedela ikings Of The Weekend (DJ Sphectacula nonaves). Ukube nje babanika uhlelo lwantambama bebezongena khaxa, balwenze undabizekwayo njengoba benza kwigagasi FM. Ngiyacabanga sesifikile isikhathi sokudedela “amakhehla”, banike abantu abasha ithuba. Ngikhuluma la ngabantu abafana nodj Siyanda, Oskido nabanye asebekhulile.
Uyangichaza wona lo msakazo ngoba kabenqeni ukuthatha izinqumo ezingalindelekile ezishiya abantu bebambe ongezansi.
UKHOZI FM lugxile kakhulu olimini lukamageba, bese lugxila kakhulu ezindaweni ezisemakhaya nakuba kungabalula ukusabalala lugxile nakwezisemadolobheni ngoba luyafinyelela kweziningi. Awubheke nje abaphathi abangene emuva kukabhodloza (Welcome Nzimande) akukho shintsho olutheni obalwenzile.
Ukungena kukasgqemeza (Sipho Mbatha) kolwasekuseni kwaba yimpoqo ngoba sekuxoshwe ulinda Sibiya. Nokungena kukatshatha Ngobe ntambama kwaba yimpoqo ngoba usipho eseyongena ekuseni.
Ukuthathwa kukabheka Mchunu ayofakwa kuSigiya Ngengoma kwakuwukuyobamba nje, njengoba kwasekunokungezwani phakathi kukaTshatha nongizwe Mchunu kulolu hlelo.
Ngibona bazithola bephoqeleka ukumfaka ndawonye ubheka nongizwe ngoba bebona lumsinda uhlelo ubheka uma esakaza yedwa. Bona belu baphinde bamchitha ungizwe ngoba kunengcindezi yokuthi ucheme nabaculi abathile. Akukho msakazi ogqamile abamqashile ngaphandle kukaselby Mkhize naye owayengene ezokwenza umgosi njengoba egcine esenohlelo.
Nabo “kunamakhehla nezalukazi” okumele babadedele bese benika intsha ithuba. Bagadeke ngoba nakhu nomhlobo Wenene FM nelesedi FM bayeza bayashoshela.
Angibonge, nguthemba Dlamini emnambithi. *Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali.