Izitabane zibona intombi kuyena
USEBHEKE eqenjini lesizwe lenetball ujessica Khomo osanda kuqokelwa kwisouth Africa A okuzokuthi ngomhla wama-28 nowama-29 kwezokwethwasa amabombo awabhekise emelbourne, e-australia, lapho ezokube emele elakuleli elizokube lidlala kwiFast 5 World Series. Le midlalo idlalwa ngabadlali abayisihlanu.
Iningizimu Afrika izokube idudulana ne-australia, inew Zealand, ijamaica, imalawi neEngland.
Ukungena kwale ntokazi edabuka emgababa ogwini oluseningizimu yekwazulu-natal kwisouth Africa A, kungase kumvulele amathuba okuwelela eqenjini likazwelonke lakuleli lebhola lomnqakiswano, iproteas.
Kuleli qembu kugijima ubongiwe Msomi ongukaputeni noprecious Mthembu abadabuka KwaZulu-natal. Uqale ukuzihlanganisa nalo mdlalo esafunda ewarner Senior Primary. Uphothule ugrade 12 ngowezi-2008 emanzimtoti High School wabe esenza iziqu zebachelor of Education (B.ED) e-unisa.
Ngowezi-2014 ubizelwe eqenjini lesifundazwe lebhola lomnqakiswano, ikingdom Stars elidlala kwibrutal Fruit Netball Premier League.
Ukungabi bikho kahle kwemali kulo mdlalo kumphoqe ukuba awushiye phansi ngowezi-2015 wagxila emsebenzini wakhe wokufundisa kwazise ubesemusha kuwo kungelula ukulokhu ecela.
Ungaphansi kohlelo lomnyango Wezemidlalo lwesifundazwe, i-elite athlete development programme athi lumsiza kakhulu. Uthi uma belimala umnyango uyabasiza ngakho konke abaku-dingayo ukuhlala bephilile.
Uzalwe mhla zili-18 kunhlaba (May) ngowe-1991. Unina nguMaphasika Khomo. Babili kubo, welama uslindile.
Uthi usuku lwakhe luqala ngehora lesine ekuseni eziqeqesha. Ngelesi-7 usuke eseya emsebenzini lapho efundisa khona e-our Lady of Fatima. Uthi unina uyikho konke empilweni yakhe yize isikhathi esiningi ebengasichithi nabo esebenza emakhishini ukubondla.
Ingxoxo YELANGA Langesonto nojessica ngempilo yakhe yaNgaphandle kwenkundla ihambe kanje:
ILANGA Langesonto: Usichitha kanjani isikhathi sakho?
Jessica: Isikhathi esiningi ngisichitha nendodana yami umpilo. Uneminyaka eyisihlanu ubudala. Ngihlala naye uma ngingekho emsebenzini. Ngifundisa isizulu kwagrade 5 nakwa-7 bese kuba yigeography kwagrade 7.
ILANGA Langesonto: Ugcine nini ukukhala?
Jessica: Ngigcine ngomgqibelo ngibukela enye i- movie, ired Bust.
ILANGA Langesonto: Uhamba nganhloboni yemoto?
Jessica: Okwamanje ngihamba ngehyundai kodwa ngizifela ngeAudi Q7.
ILANGA Langesonto: Uzithole nini izincwadi zokushayela?
Jessica: Ngowezi-2011.
ILANGA Langesonto: Uke waba sengozini?
Jessica: Kangikaze ngibe sengozini enkulu. Kuba yizinto ezincane nje.
ILANGA Langesonto: Usushadile?
Jessica: Cha, kangikathathwa.
ILANGA Langesonto: Ngabe uyasonta?
Jessica: Cha, kangisonti.
ILANGA Langesonto: Uyakholelwa emuthini?
Jessica: Kangiwexwayi.
ILANGA Langesonto: Yini eyokuqala oyenzayo uma uvuka ekuseni?
Jessica: Ngiqabula ingane yami.
ILANGA Langesonto: Wake washelwa yintombazane?
Jessica: Hahahaha... Yebo, ngake ngashelwa. Phela ziningi izitabane kwezemidlalo futhi kangizexwayi.
ILANGA Langesonto: Uthini umbono wakho ngomfundi waseWalter Sisulu University ongenelwe ur14 million ngephutha?
Jessica: Ngikholelwa ekutheni imali engene kwi- account yami, ngeyami. Bengingeke ngitshele muntu bengizozidlela imali ngivale umlomo.
ILANGA Langesonto: Ukhona omunye umdlalo owuthandayo ngaphandle kwenetball?
Jessica: Ngikhonze ukugijima. Bengikwenza ngisafunda kanti nebhola lezinyawo ngiyalithanda.
ILANGA Langesonto: Ubani umdlali omthandayo?
Jessica: Ngiyazifela ngokatrina Grant odlalela iqembu lesizwe lenetball lasenew Zealand.
ILANGA Langesonto: Lukhona uhlelo oluthandayo kwitv?
Jessica: Ngithanda le drama entsha edlala KWISABC 1, itjovitjo. Iyangichaza.
ILANGA Langesonto: Yimuphi umbala okushaya ngaphakathi?
Jessica: Ngizifela ngophinki.
ILANGA Langesonto: Usebenzisa liphi iteku lokudlala, futhi ugqoka muphi u- size?
Jessica: Ngigijima nge-asics. Ngigqoka I-UK-9.
ILANGA Langesonto: Yisiphi isilwane osithandayo noma osesabayo?
Jessica: Ngibaleka ngishiye isithunzi uma kuqhamuka inyoka. Nokho kasikho isilwane engisi- thandayo.
ILANGA Langesonto: Ukhona ezinkundleni zokuxhumana?
Jessica: Ngikhona kwifacebook, “Jessica Simangele Khomo”.
ILANGA Langesonto: Uma ungase ube ngumengameli wezwe yini ongayenzela isizwe?
Jessica: Ngingavula izindawo zamakhono ikakhulukazi ezindaweni zabantu abampisholo kwazise zishoda kakhulu. Kubalulekile ukwenzela abantu into abazokwazi ukuphila ngayo. Nginenkampani (NPO) esiza izingane, nginesifiso sokuyibona isabalala naso sonke isifundazwe kwazise ngiyazifela ngezingane.
ILANGA Langesonto: Uzibona ukuphi eminyakeni eyisihlanu kusuka manje?
Jessica: Iphupho lami elikhulu wukudlala eqenjini lesizwe lenetball, iproteas.