Izimfuno zomqeqeshi webucs kubadlali
Uzokwenza i-orlando Stadium esikamaminzela
UMQEQESHI we-orlando Pirates udalula izimfuno zakhe kubadlali bale kilabhu ngaphambi komdlalo omqoka.
Ibucs izodudulana ne-ajax Cape Town kowe-absa Premiership ngolwesibili ngo19h30 e-orlando Stadium, esoweto. Lo mdlalo uthathwa njengonzima kwibucs njengoba i-ajax ivamise ukukhuphula amasokisi uma ibhekene nayo.
Umilutin “Micho” Sredojevic ( osesithombeni) ocija ibucs, uthi uselwenze lonke ucwaningo ngezimbangi wabe esedalula izimfuno zakhe kubadlali.
“Ngesizini edlule amakilabhu abezitapela amaphuzu kwi-orla- ndo Pirates, ngisho nalawa athathwa njengamancane. Kulokhu ngifuna iphele nya yonke leyo yinto, kwazise kayikho ikilabhu kulawa athathwa njengamancane okufanele igoduke namaphuzu agcwele esibayeni sethu.
“Ngibadonse ngendlebe abadlali bami ngokubaluleka kokunqoba imidlalo yasekhaya ikakhulukazi kula makilabhu athathwa njengamancane. Izinga linyukile impela ebholeni laseningizimu Afrika kodwa ngeke sikubalekele ukuthi ipirates isathathwa njengekilabhu enkulu.
“Ngakho-ke ngifuna laba bafana babuyise leso sithunzi ngawo amakilabhu anjenge-ajax. Kangiyithathi kancane i-ajax kodwa ngisho ungahamba uye kunoma yiyiphi iligi emhlabeni kawekho amakilabhu alinganayo ngokwezinga, ahlale ekhona lawa amakhulu ngakho-ke nathi kufanele sisibuyise isithunzi sethu,” kusho usredojevic.
Uthi lamasonto ambalwa awatholile ekhefu lefederation of International Football Association (Fifa) amvule amehlo ngezinto eziningi wathola nethuba lokulungisa izindawo ebezixega.
“Ngikwenze konke kula masonto amathathu ebesinawo singadlali, kangikhali ngalutho. Sengilindele wona nje umdlalo ngoba konke sekuqondile manje,” kusho lo mqeqeshi.
Isiyonke imidlalo ye-absa Premiership ehlelelwe ukugijinywa phakathi nesonto imi kanje:KUSASA NGOMSOMBULUKO Egoble Park: Free State Stars vs Mamelodi Sundowns 18h00 (SS4).
NGOLWESIBILI
Elucas Moripe Stadium: Supersport United vs Platinum Stars 19h30 (SS11).
E-orlando Stadium: Orlando Pirates vs Ajax Cape Town 19h30 (SS4).
E-old Peter Mokaba Stadium: Polokwane City vs Bloemfontein Celtic 19h30.
Enelson Mandela Bay Stadium: Chippa United vs Baroka FC 19h30.
Eking Zwelithini Stadium: Amazulu FC vs Maritzburg United 19h30.
NGOLWESITHATHU Ebidvest Stadium: Bidvest Wits vs Golden Arrows 19h30 (SS11).
Ecape Town Stadium: Cape Town City FC vs Kaizer Chiefs 19h30 (SS4).