PHILANI NCALANE
Kangiyiphathi-ke eyesigaba sesafa ABC Motsepe League.
Kuze kumbambathiswe kubekwe iminyaka ethile yabadlali okumele badlale kulesi sigaba ngenhloso yokuyenga abaxhasi ukuze kube sengathi kuhloswe ngaso ukuthuthukisa ibhola.
Eqinisweni nje, isafa ihluleka ingcaca ukwenza umsebenzi wayo wokuthuthukisa ibhola nokulawula amaqembu esizwe, kuhlanganisa nebhola labesifazane elifana nento efile. Bengikuba nje kujatshulwa abakwasasol bevuselela ubudlelwano nesafa, kodwa kungashiwo lutho ngohlelo lweligi entsha yabesifazane esilokhu sifundekelwa ngokuthi izosungulwa. Njalo nxa ngibuka isikwati sebafana ngivamise ukubuka abadlali engibazela ebholeni lezikole elididiyelwa yisouth African Schools Football Association (Safa).
Uma kuwukuthi ibafana isebenzisa inqwaba yabadlali abaphuma ebholeni lezikole, pho kungani isafa iyeka ukuqinisa ezayo izinhlaka bese igagamela ifune ukufaka unyawo lwedada lapho kubukeka kungonakele kakhulu khona, kwiSasfa?
Ungalisingatha kanjani ibhola lezikole ezweni lonke usahlulwa wukulawula imotsepe League NESAB? Mhlawumbe sekuyisikhathi sokuthi ibhola liholwe ngabantu elisemithanjeni yegazi kubona, hhayi osopolitiki ngoba babuye badume ngokuba ngogombela kwezabo.
Ngiyathuka nje nxa u-adv Norman Arendse ongummeli wesafa, ophinde abe yilungu lesigungu sale nhlangano kuzwelonke, uma ethi bazosifakela izibuko isinqumo sokubuyiselwa ensimini komdlalo webafana nesenegal. Lo mdlalo wokuhlungela indebe yomhlaba kunqunywe ukuthi ubuyiselwe ensimini ngenxa yokuphekwa kwawo ngujoseph Lamptey waseghana ongunompempe osexoshiwe ebholeni.
Isafa ingalwa kanjani nezinhlaka zangaphandle zomthetho isabuye igxobe eyayo imitheto ngezinyawo? Phela ukuba isafa kukhona okuncane ekwaziyo ngomthetho ngabe usuwumlando umbango wesafa ethekwini Region.