Usazimisele ngokusebenzela unkulunkulu
KUNZIMA ukuqeda inkulumo engaliphathanga igama likankulunkulu urhulani Manzini ongumgadli osematheni wamazulu FC abebhekene neplatinum Stars izolo ngomgqibelo ebusuku eking Zwelithini Stadium, emlazi.
Lo mgadli uvalele amagoli amabili usuthu lubhudluza ibidvest Wits ngo-3-0 phakathi nesonto emlazi. Umanzini odabuka ebushbuckridge, esifundazweni impumalanga, ugqame kunobhutshuzwayo egijima kwi-arconbush wase ejoyina ibatau FC wadlulela kwijomo Cosmos ngaphambi kokujoyina isivutsa Stars.
Usuke kuyona wayogijima kwiWitbank Spurs FC ayishiyile wajoyina iplatinum Stars. Usuke kuyona wajoyina ichippa United njengoba esegijima kumazulu FC kule sizini. Lo mgadli ufunde etimbavati Primary wase edlulela emagwagwaza High, empumalanga, ngaphambi kokufudukela e-eldorado Park, egauteng.
Uyiswe ngunina ukuyozama inhlanhla kwimokopane Academy, elimpopo, esemncane. Uhlale kulesi sikhungo iminyaka emibili benomfowabo omdala u-amukelani. Ingxoxo kamanzini NELANGA Langesonto ngempilo yakhe yaNgaphandle kwenkundla ihambe kanje:
ILANGA Langesonto: Ungazichaza njengomuntu onjani kumuntu okubukela kude?
Manzini: Ngiwumuntu ozithobile. Ngingumntwana kankulunkulu. Ngisindisiwe. Ngiphila impilo eqondile futhi kangihlukani nokuthandaza. Ngiyathanda ukubona abantu bejabule.
ILANGA Langesonto: Usugcagcelwe?
Manzini: Ngishadelwe ngugcina Manzini umanzima ngozibandlela (December) ngonyaka odlule. Sihlangane naye ebandleni irhema, ebhayi, lapho ebengikhonza khona njengoba bengidlala kwichippa United.
ILANGA Langesonto: Uhlala kuphi njengoba usugijima ekilabhini yasethekwini?
Manzini: Ucabanga ukuthi ngihlala eclub House yini? Ngihlala endaweni yami emorningside. Eclub House kuhlala abantu abangenawo amakhosikazi. Angathini nje unkosikazi sengihlala naye eclub House. Nasebhayi ngifike ngazithengela umuzi okumanje ngiqashise ngawo.
ILANGA Langesonto: Seninabo abantwana?
Manzini: Kasikakabi nabo abantwana kodwa bazo
kuza, futhi bazokuba baningi nje impela.
ILANGA Langesonto: Kuyiqiniso ukuthi uzalwa emndenini ozifela ngonobhutshuzwayo?
Manzini: Yebo, kunjalo. U-amukelani omdala sijoyine naye imokopane. Useliyekile ibhola ngenxa yokuhamba kweminyaka.
Abantu mabalindele ushaka okumanje ugijima kwibenfica edlala kwisouth African Football Association (Safa) Mpumalanga ABC Motsepe League. Uyababa futhi uzogijima maduzane kwiAbsa Premiership. Kwethu kukhona umanzini Junior nosinhle okunguyena yedwa intombazane.
Ubaba ngu-ernest Manzini. Umama wethu udlule emhlabeni ngonyaka wezi-2007. Ngibuhlungu nje ngoba nguyena osiyise kwimokopane engivulele amasango ebholeni.
ILANGA Langesonto: Usichitha kanjani isikhathi sakho uma ungekho ekhempini?
Manzini: Ngizihlalela endlini ngifunde ibhayibheli nezincwadi ezahlukene. Kumanje ngifunda ekamyles Munroe.
ILANGA Langesonto: Ukhona umdlalo owuchungechunge owukhonzile kumabonakude?
Manzini: Ngizifela kakhulu ngeSibaya. Ngichazwa kakhulu nguFezile Khumalo (odlalwa nguAndile Mxakaza) noskhaleni (olingiswa nguzakhele Mabasa).
ILANGA Langesonto: Ukhona omunye umdlalo obuyingxenye yawo usemncane?
Manzini: Bengikhonze ukugijima. Nokho-ke esikoleni bengidlala kakhulu ibhola ngase ngiqhubeka nalo.
ILANGA Langesonto: Ushwibeka ngaluphi uhlobo lwemoto?
Manzini:
Ngisebenzisa igolf 6. Yiyona yodwa imoto enginayo.
ILANGA
Langesonto:
Ngike ngezwa kuthiwa usanda kungena ebhizinisini lezindlu, ngabe liqhuba kanjani?
Manzini: Ngisahlela ukungenisa kulowo mkhakha. Angikakagxili kakhulu kwezamabhizinisi ngoba ngisabhekene nebhola. Khona ngizogxila impela kulowo mkhakha webhizinisi.
ILANGA Langesonto: Uhlele ukwenzani ngemuva kokubeka amakhokho ethala?
Manzini: Ngihlele ukusebenzela unkulunkulu njengoba ngisindisiwe. Ngizogxila kakhulu ezintweni zesonto. Nokho-ke ngizobasiza abadlali abasebancane abanesifiso sokudlala ebholeni elikhokhelayo.
ILANGA Langesonto: Njengoba ungumntwana kankulunkulu, wenzenjani nxa abalingani bakho benomgubho, beshisa inyama beshaya nezi- phuzo ezibandayo?
Manzini: Angisayingeni impilo yalolo hlobo. Izinto ezinjalo ngazenza ngadlula kuzona. Sengingumntwana kankulunkulu manje.
ILANGA Langesonto: Wenzenjani uma kusetshenziswa umuthi ekilabhini?
Manzini: Angikholelwa ezintweni ezingaphili mina. Ngeke ngiyingene eyomuthi ngoba ngikholelwa kunkulunkulu ofuna ngikhonze yena kuphela. Ukusebenzisa umuthi kungabe kusho ukuthi ngiyamngabaza unkulunkulu. Bangawusebenzisa abanye kodwa buqamama nami ngoba kangihlangani impela nawo.
ILANGA Langesonto: Uya kanjani enkonzweni njengoba nijwayele ukudlala ngezimpelasonto?
Manzini: Ngihlukumezeka kakhulu ngalesi simo. Inkinga wukuthi kunzima ukuya enkonzweni nangesonto nxa kuwukuthi besidlala ngayizolo ngomgqibelo ngoba umzimba usuke ubuhlungu udinga ukuphumula.
Yingakho ngizogxila kakhulu kwezenkolo ngemuva kokuyeka ibhola ngoba isikhathi kangisitholi okwamanje.
ILANGA Langesonto: Yiluphi uhlobo lomculo olukushaya ngaphakathi?
Manzini: Ngikhonze umculo wokholo. Ngidlala kakhulu usinach wasenigeria nejoyous Celebration.
ILANGA Langesonto: Yini ekuchaza ngetheku njengoba usanda kufika kuleli dolobha?
Manzini: Ngisuke nginakho konke nxa ngivakashele egateway. Yinhle leya ndawo. Nokho-ke ngisahlela ukuya eshaka Marine World ngoba kangikaze ngiye ngenxa yokuxinwa yibhola.
ILANGA Langesonto: Ukhona ezinkundleni zokuxhumana?
Manzini: Yebo. Ngisebenzisa ifacebook, i-instagram netwitter. Kwifacebook ngiwurhulani Manzini kanti kwi- Instagram ngiwurhulani bese kwitwitter ngitholakale ku-@manzinir.
Ngisebenzisa i-iphone 6. Abalandeli bamukelekile ukungilandela kulezi zinkundla.
ILANGA Langesonto: Iyiphi ikilabhu okhule uzifela ngayo kuleli naphesheya kwezilwandle?
Manzini: Ngikhule ngithanda i-orlando Pirates ngoba ibiyesekwa kakhulu ngubaba.
Phesheya ngithanda i-arsenal yase-england nereal Madrid yaseSpain.
ILANGA Langesonto: Yisiphi isilwane osithandayo nosesabayo?
Manzini: Ngilithanda kakhulu ibhubesi ngoba liyinkosi yezilwane zasendle.
Yilona futhi engilesabayo. Ngisaye kanye ukuyolibona ekruger National Park okuyisiqiwi sangakithi empumalanga.