Bashade isibili abakwantshangase
JOSHUA 24 IVESI LE-15: "Mina nendlu yami siyakumkhonza ujehova" lawa ngamazwi afundwe nguMbhishobhi Sipho Manqele webandla I-african Church of Christ, eyala ijaji umnu David Ntshangase nowakwakhe unkk Sphiwe Makhumalo Ntshangase abebeshada okwesibili okuyinto engajwayelekile.
Lo mshado ubuhehe izihambeli ebezivela emazweni omhlaba useMeetmekaar, emtubatuba, enyakatho yekwazulu Natal ngomgqibelo.
Umbhishobhi Manqele onguyise kankk Ntshangase ngokomoya, ukhonza ebandleni lakhe uthe lokhu okwenziwe ngumnu Ntshangase ukuba athi eseshade iminyaka eminingi nowakwakhe kepha azizwe sengathi akwanele akukhokha ngesikhathi beshada okokuqala kuyizinkomba zokuthi ukhuliswe kahle ngevangeli.
“Siyaziqhenya ngawe ndodakazi siyibandla. Sekukini-ke ukuba nizikhethele ukuthi nina nifuna ukuqhubeka nihlale kujehova njengoba enenzele umusa ongaka.
“Ujoshuwa waphumela obala wathi yena nendlu yakhe uzakumkhonza ujehova, akabanga nokungabaza,” kushumayela umbhishobhi Manqele.
Umbhishobhi ube esenikeza ithuba umnu Ntshangase ukuba ayichaze le ngqayizivele yakhe wathi:
“Le ntokazi ngiyithande ngayishada ngazi ukuthi ngishada owesifazane oyedwa, kepha ngathi sengihlale naye ngathola ukuthi ingabantu ababili iyodwa. Ngalokho ngichaza ukuthi ungimangazi- le ngezenzo zakhe ezinhle, wanginika inhlonipho engifanele.”
Umnu Ntshangase uthe abanye besifazane bathanda umuntu ngalokho anakho.
“Lona akasiye umathandimali, uthembekile ngisho emabhizinisi ami kakulahleki ngisho isenti. Umakhalekhukhwini wakhe akawufihli uma ekhuluma nabantu akanamfihlo ngisho kowhatsapp bakhe.
“Bengilokhu ngimtshela kancane ngithi ngizomlobola kabili njengoba naye embili, angakholwa - ngempela ngiye ekhweni lami nakhona abangakholwa ngabacela ukuba babize noma yini abayifunayo ngiyikhokhe yonke,” kusho umnu Ntshangase enanelwa yizihlwele ngehlombe.
Ephetha inkulumo yakhe umnu Ntshangase uthe kukho konke asekushilo ubonga unkulunkulu nebandla akhonza kulo, umkakhe kanye nabazali bakhe okuyibo abakhe uhlobo lwenkosikazi ayilo.
“Ngiyabonga Mbhishobhi. Ngibonga nakuwowonke amalunga ebandla, ngisho nakubangani bakhe abahle ngoba ukuba ubenabangani ababi ngabe akawuzuzanga lo mqhele esimethwesa wona namuhla,” kuphetha umnu Ntshanga- se.
Ezibongela unkk Ntshangase ubonge umyeni wakhe ngokumenzela okungajwayelekile ezweni ukuba alotsholwe kabili. Ubonge nomndeni wakhe ngendlela omkhulise ngayo, nonina obekhona nebandla lakhe.
Umangidi obekhulumela umndeni wakwakhumalo uthe bewumndeni kabakholwanga ngesikhathi kufika abakhongi bakwaNtshangase beyocela isihlobo esihle ekubeni bake basicela.
“Thina sabe sicabanga ukuthi mhlawumbe kukhona okungalungile asekwenzile umntwana we- thu, kepha kwathi sesibona kufezeka samangala,” kusho umangidi.
Unkk Beauty Buthelezi wedlulise izeluleko kwabasha ukuba bahlale enkosini engumenzi wezinto zenzeke, wathi ukuba unkk Ntshangase walibala abangani wangahlala enkosini ngabe awukho lo mcimbi ofana nalona.
Umnu Wiseman Mcoyi uthe mawande lo mkhuba omuhle osuqalwe ngumnu Ntshangase wokuba abesimame balotsholwe kabili uma benze kahle.
Inkosi yakwampukunyoni umzokhulayo Mkhwanazi ubabaze isibindi nengqayizivele endaweni yakhe, wancoma kakhulu okwenziwe ngumnu Ntshangase wathi ubaphakamisile endaweni.
Amadoda amaningi ikakhulukazi awakwantshangase ngesibongo akhalile ngokuthi umnu Ntshangase usebafake enkingeni yokuthi nabo benze okufanayo komkabo.
Lo mshado uphenduke idili lomculo, i-afro Soul yodumo ishaye into ecokeme, ikwaya yebandla yacula izingoma kudala ibhidiswa nguye umbhishobhi Manqele.
Ike yashaya ingoma endala esihloko sithi “Ntaba ezikude zingumasithela” kwasukuma wonke umuntu, kwayena umnu Ntshangase wadansa waze wakhasa phansi.
Bekukhona nomculo kamasikandi, ODJ bexuba ulozolo lwezingoma. Uhlelo beluphethwe ngesinono ngumnu Anthony Ntshangase.
Kuphethwe ngomkhuleko othinte izinhliziyo, kunxuselwa intsha ukuba ishadane ingagcini ngokukipita.
knowledge.simelane@ilanganews. co.za