Ubiza ingane ngesibongo senye indoda
UKHULELISE ENYE INTOMBI
PASTOR, nginomuntu esengithandane naye iminyaka eyisihlanu kodwa ukhulelise omunye usisi. Usenengane kodwa usephinde wabuya kimina - ngenzenjani Mfundisi Zondo.
IMPENDULO: Dadewethu, kwezothando isinqumo silele kobhekene nenkinga, akekho omunye okumele anqumele omunye empilweni.
Othandweni kunezikhathi lapho kufanele ulalele inhliziyo yakho ukuthi ithini, bese ucabanga ujule ngesinqumo osuke uzosithatha ukuthi usithathelani. Mhlawumbe imibuzo embalwa ongazibuza yona ngalo muntu osebuyela kuwena wukuthi mhlazane nihlukana nanihlukanelani, nokuthi njengoba senibuyelana manje nizobe nihlanganiswa yini.
Uma uyithola impendulo lapho kuyoba lula ukuthatha isinqumo. Okufanele ukuqaphele wukuthi ungayenzi into ongenasizathu sokuthi uyenzelani.
Uma usibona isidingo sokwenza into, yenze. Angifuni ukukhuluma kakhulu, isinqumo silele kuwena. Ungaboyigibela itekisi ungazi ukuthi iyaphi.
ANGISAMUZWA KAHLE
PASTOR, ngingowesilisa oneminyaka engama-37 ubudala, ngithandana nowesifazane oneminyaka engama-29.
Unenkinga yokuthi ubenza izinto nanoma yimuphi umuntu wesilisa kodwa ngimbekezelela, ngambonisa ngoba ngimthanda.
Usekhombisa izimpawu zokushintsha kanti mina ngapha sengehlelwe wumdlandla, yena usesha amashushu ngami, akusavumi kimina mfundisi. Ngenzenjani uma kunjena?
IMPENDULO: Cha mfowethu, lapha othandweni ungaboyenza into engekho enhlizweni yakho nasemoyeni wakho. Ungayenzi into sengathi ukhonjwe ngesibhamu.
Uma ubona ukuthi into ayihambisani nawe futhi ayivumi kuwena ungayenzi - noma ngabe usuyitshelwa yimina noma yingelosi, ungalokothi uyenze uma kungavumi ngaphakathi kuwena. Ungakuvumi nhlobo nje ukuhlohlwa ngabantu, bakwenzise into ongahambisani nayo.
Uma wenza into ngoba ishiwo ngabantu kuyothi lapho ugileka bese ukhala uthi bayakuhlomekisa. Kufuneka njalo othandweni uma usugileka uzisole wena. Yonke into othandweni engasavumi enhlizweni yakho ungaboyiphoqa, kufanele uyenze into ngoba isuka enhliziyweni.
Ngesinye isikhathi kuyasiza ukuba ukuzibuze wena nje ngenkinga obhekene nayo, uzihlolisise kahle. Uma uyindoda ngokwanele hlala phansi nomuntu wakho umbonise ngemizwa yakho ngemuva kwezinto abezenza, mhlawumbe uma usubhodlile iyogcina ishintsha.
INGANE UYIBIZA NGESIBONGO SENYE INDODA
PASTOR, nginenkinga, ngathandana nomuntu wesifazane ngimthola ethandana nomunye kodwa isikhathi esiningi ubesi- chitha nami.
Ugcine ekhulelwa, ingane uyibiza ngesibongo saleya ndoda, manje iyangidida le nto mfundisi, ngenzenjani?
IMPENDULO: Mfowethu, ukuze ngikuphendule, ngiyafisa ukuba kucace ukuthi ngabe ingane ngeyakho noma ngeyalona omunye ubhuti na ngoba uyasho ukuthi kwahamba kwahamba wagcina usisi ekhulelwa kodwa awuvezi ukuthi ugcine ekhuleliswa ngubani.
Uma kuwukuthi mhlawumbe ukhuleliswe nguwena, nike nahlala yini phansi nayixoxa leyo nto nomuntu wakho ngoba ushatini wenu lo okumele niwuzwe ukuthi unosawoti ongakanani.
Yini esiyinkinga manje kuwena uma usisi ebiza ingane ngesinye isibongo - ngabe usisi uyaphika ukuthi ingane ngeyakho ekubeni wena uzitshela ukuthi ngeyakho?
Kuzwakala sengathi nobabili anikaze nixoxe ukuthi ingane ekabani - usisi akakaze akutshele ukuthi ingane ngeyakho, nawe awukaze usho ukuthi ingane ngeyakho. Uma nike naxoxa bewungeke uvume ukuthi ingane yakho ibizwe ngesibongo somunye umuntu.
Le nto idinga niyixoxe nobabili ngaphambi kokuba kungenelele abanye abantu.
Ungangithinta kule nombolo engezansi.
UKUSHONA KOMFOWETHU AKWEDLULI ENHLIZIYWENI
PASTOR, ngicela ungikhulekise baba. Kwashona umfowethu ebulawa ngabantu abangaboshwa. Uma sithi siyabuza emaphoyiseni, umseshi uvele athi singamfundisi umsebenzi wakhe. Manje lesi simo asedluli enhliziyweni. Washona ngomfumfu (October) 26 nyakenye.
IMPENDULO: Dadewethu noma mfowethu, ngiyazwelana nobuhlungu obhekene nabo.
Kuyenzeka ngesinye isikhathi ukuthi uma sithula into emaphoyiseni bese sifisa sengathi kungashesha kube khona okuthile okwenzekayo. Angisho ukuthini kodwa ngikhuluma ngesimo esisehlelayo sonke lapho siye sifise sengathi amaphoyisa angayixazulula manje indaba.
Uma kukhona eningagculisekile ngakho ekusebenzeni kwamaphoyisa niyakwazi ukwedlulela phambili, nibike kwabakhulu abawaphethe ngoba phela nawo aphethwe. Nokho kufanele sikuqaphele ukuthi amaphoyisa nawo anamacala amaningi asuke esebenza ngawo kanti okunye okumele sikuqonde wukuthi ipho- yisa ngeke limbophe umuntu lingakabi nobufakazi obubambekayo ngecala.
Indlela thina esisuke sibuka ngayo izinto kuyenzeka ingafani nhlobo nendlela bona abasuke bebuka ngayo noma ngendlela abaqeqeshwe ngayo ukwenza umsebenzi wabo.
AKUVUMI UKUBA NGIKHOHLWE NGUYE
PASTOR, ngathandana nomunye usisi, bengimenzela konke akufunayo wavele wangishiya waya kwabanye, ngasala kanjalo.
Inkinga wukuthi noma sengithole abanye yena akaphumi enhliziyweni, ngihlala ngimkhumbula njalo. Bese sineminyaka emine sithandana. Ngenzenjani mfundisi?
IMPENDULO: Akuwena wedwa obhekene nale nkinga obhekene nayo, baningi nabanye abakhala isililo esifanayo.
Ngicabanga ukuthi unenhlanhla ngoba ukugila nje benisajola ningashadanga. Mhlawumbe kukhona abantu abezwa lobu buhlungu obuzwayo sebesemshadweni. Kube ngcono aziveze ubunjalo bakhe ungakamfaki iringi.
Kunezimo empilweni esingeke sazishintsha, okuthi noma zibu- hlungu kodwa kuphoqeke ukuba sizigwinye zishisa.
Umuntu uma engasakufuni ngeke umphoqe ukuba akuthande ngenkani.
Usuke unenhlanhla uma ekukhombisa kunokuba akwenze isilima.
Kubo bonke abafundi bephephandaba lethu siyafisa ukuba sisizane futhi ngiyafisa ukuniphendula nonke kepha ngebhadi ucingo noma inombolo iyodwa ngakho akulula ukunibamba nonke.
Uma ufona uyizwa ikhala, ngesinye isikhathi ngisuke ngisakhuluma nomunye.
Nixole kuleyo ndawo kodwa ngokushiya nje umqhafazo, siyakubeka nasemkhulekweni.
Upastor Sthembiso Zondo ngumeluleki nomethuli wezinkulumo ezakhayo.
Wethula inkulumo ekhuthazayo ngolwesine bese ephendula imibuzo yabafundi ngezinkinga zempilo nezothando KWILANGA Langesonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kufacebook: Sthembiso Zondo Fan page noma kuwhatsapp: 082 070 8034. Abafisa ukukhonza nathi, bazosithola njalo ngesonto ngo-10h00 ejewish Hall.
Uma udinga ama-direction thumela ISMS ku: 078 419 1024