WANDISA ISIBALO SOSOMAHLAYA
UKUNGAVELELI kwabesifazane endimeni yamahlaya sekwenze unonto R ongusomahlaya oseke wahlabana ngendondo kumasouth African Traditional Music Achievement Awards (Satma) ukuba ahlele umcimbi okuzonandisa kuwo osomahlaya besifazane kuphela.
Uthi ukuqaphelile ukuthi bayashoda abesifazane kule ndima - uma ukhuluma ngabesifazane abangosomahlaya awufiki ngisho kwabayisithupha uma ubabala abaziwayo.
“Ukuba nemicimbi okungeyabesifazane kuphela kuzosisiza ukuba sichushisane siphinde sifukulane. Yize sikhula isibalo sosomahlaya kodwa sishaya ngonyawo lonwabu. Nathi siyakwazi ukwenza lo msebenzi owenziwa ngozakwethu besilisa kodwa kwesinye isikhathi uthola ukuthi sizibukela phansi - uthole ukuthi uma kuke kwathiwa mhlawumbe kuzobe kukhona uskhumba kulowo mcimbi, bese uzenyeza, ngesinye isikhathi uthole ukuthi kasinikwa nhlobo ithuba,” esho. Uthi kulo mcimbi wamahlaya kuzobe kukhona zonke izinhlanga, akekho ozovalelwa ngaphandle. Phakathi kosomahlaya abazobe bekhona kubalwa ukhanyisa Bunu, ulerato Tau, uvee noleah. Abazonandisa ngomculo ngudj Happygal NOTDK Macassete.
“Kuningi esizobe sikhuluma (emahlayeni) ngakho ngoba uma sihlekisa sifuna ekugcineni umuntu kube khona isifundo asitholayo. Mina ngizokhuluma nangokulingana ngokobulili, ngike ngizwe abesilisa bekhala uma bewashiswa izitsha bahlezi bethi imisebenzi yasendlini ingeyabesifazane. "Kanti izitsha ziwashwa ngamabele yini noma kusetshenziswa izandla,” kuqhuba unonto R.
Lo mcimbi uzoba seBat Centre mhlaka 26 January. Ngokusho kukanonto, kuyothi ngoncwaba (August) bese kuba nomcimbi omkhulu. tzondi@ilanganews.co.za