Uyisibonelo esihle ulungi Ngidi
KUNGABA wumqondo ophusile ukuthi intsha yaseningizimu Afrika ekwezemidlalo isike iphethini kubalingani bayo abavelele emidlalweni eyahlukene abakwaziyo ukusheba ezemidlalo yemfundo.
Lokhu kuyasiza ukuze umdlali akwazi ukuqhubeka nempilo njengoba kuyinto engafihliwe ukuthi impilo imfishane kwezemidlalo.
Ngibhala ngalokhu nje, yingoba ngichazeke kakhulu ngokuzwa ukuthi ulungisani “Lungi” Ngidi ongundabamlonyeni kubathandi bezemidlalo eningizimu Afrika ngenxa yokwenza kahle kwakhe kwikhilikithi yomhlaba, wenza unyaka wokugcina ezifundweni zobumeli e-university of Pretoria. Ungidi uyingxenye yabadlali abayisibonelo esihle kakhulu entsheni yaseningizimu Afrika.
Abadlali beminye imidlalo abayishalazeli imfundo, kodwa inkungu ibukeka ihlasele kwabaningi kunobhutshuzwayo abambozwa amehlo wudumo lwesikhashana bese bekhohlwa yisikole.
Kubuhlungu ukuzwa ngabadlali ababuya kwi-african Cup of Nations, kwindebe yomhlaba, badlala emakilabhini amakhulu sekubikwa ukuthi sebegutshuzelwe wusizi.
Lokhu kuwumphumela wokushalazela isikole ngoba umuntu owaziyo umbombo kathisha wasenyuvesi ngeke abhekane nosizi lwalolu hlobo ngemuva kokuphuma kwezemidlalo.
Ngikhumbula ngoba uwayde van Niekerk ugile izimanga kumaOlympic erio de Janeiro, ebrazil, eqhuba izifundo zeba kwimarketing e-university of Free State.
Umokgadi Caster Semenya eqokwa njengesports Woman of the Year, ubenza izifundo zesports Science e-university of North West.
Uma lezi zihlabani zikwazi ukuvelela kwezemidlalo ziphinde zizinike isikhathi sokufunda, pho kuvimbeni kwabakunobhutshuzwayo?
Kangifuni-ke ukukhuluma ngemihuqa ephuma emakubo ilibangise emanyuvesi ifike ilibale wutshwala nezidakamizwa, bese ibuyela emuva iphethe usizi lokufa.
Nokho-ke akubona bonke abadlali bebhola lezinyawo abangazwani nesikole.
Ikhona leyo ngcosana efundayo nesingene yagamanxa emabhizinisini.
Sikhuluma nje, ulehlohonolo Majoro osedlala kwibidvest Wits uneziqu kwiradiography, futhi usenendawo yakhe lapho eqhuba khona umsebenzi wokwenza i- x ray. Lo mkhakha ubucayi kakhulu ukuthi ungenziwa ngumuntu omatasa nebhola, kodwa umajoro ukwazile ukugogoda kuwona. Ngemuva komsebenzi webhola lo mdlali uke abonakale esendaweni yakhe ematasa elapha iziguli.
Ngiyafisa ukubona abadlali bephenduka osomabhizinisi abavelele kuleli ngemuva kokushiya ibhola neminye imidlalo. Sikhuluma nje, u-ephraim “Jomo” Sono nokaizer “Shintsha Guluva” Motaung abadlale kwi-orlando Pirates naphesheya kwezilwandle bangosomabhizinisi abahlonishwayo.
Usono uhlale ekugcizelela ukuthi umcebo wakhe uwukhande ngebhola okwenza kungavumi ukuhlukana nalo.