UMANGELE EKHONJWA ISANGO YI-CHIEFS
USHAQISWE yisenzo sikasteve “Mphathi” Komphela ongumqeqeshi wekaizer Chiefs umdlali wayo okhishwe ngesango engazelele.
Izimpofana zithuse abalandeli bazo zibolekisa ulorenzo Gordinho kwibloemfontein Celtic.
Ichiefs izeseka ngokuthi ifuna ayothola ithuba lokudlala. Ubevele engasasitholi isikimu kwichiefs njengoba indawo yakhe ithathwe nguteenage Hadebe.
Ukuhanjiswa kukagordinho kakuthusanga abalandeli nje kuphela, kushaqise nokemiso Motaung oyindodakazi encane kasihlalo wekilabhu, ukaizer Motaung. Ukemiso usebenza kwezokukhangiswa kwale kilabhu kanti uzwakalise ukuthuka ngesenzo sikakomphela.
Ukemiso uze walibeka ngesihloko elokuthi ugordinho umbona engukaputeni wakusasa wechiefs ngakho akaqondisisi ukuthi uhanjisweleni.
Ezikhulunyelwa emakhoneni zithi umotaung ukhulumile nendodakazi yakhe, wayitshela ukuba yehlise umoya ngoba vele ukomphela uyahamba uma kuphela isizini, uzophambana nogordinho.
Lo mdlali uthi naye simshaqisile lesi senzo sikakomphela.
“Nakuba ebholeni kufanele uhlale uzilindele izinto ezinjena kodwa bengingakulindele lokhu okungehlele.
"Ngethuka ngoma ngesikhathi ngitshelwa ngoba kwenzeke isigubhukane ngingalindele. Nokho kufanele ngisamukele lesi sinqumo bese ngibhekana nomsebenzi engiwuzele kwiceltic. Okufanele ngikulwele nje wukuthi ngihlale ngisesikimini kwiceltic,” kusho ugordinho.
Ichiefs ingene kwacaca emakethe njengoba kuvulwe iwindi, isayinise abadlali abaseqophelweni eliphezulu. Isayinise usiphelele “Stash” Ntshangase obekwibaroka FC, ukabelo Mahlasela obekwiceltic noleonardo Castro obekwimamelodi Sundowns.