I-ANC ithathe isinqumo ngobuholi base-kzn

Kuzoqokwa ubuholi besikhashana

Ukuqokwa ngokushesha kobuholi besikhashana kuzosiza ukubumba iqembu.

KULINDELEKE ukuba buqokwe maduze ubuholi besikhashana be- African National Congress (ANC) Kwazulu-natal, nasefree State, kulandela isinqumo sesigungu esiphezulu saleli qembu esiphume emhlanganweni othathe izinsuku ezimbili ngolwesine nagolwesihlanu.

Lo mhlangano ubusesaint George Hotel e-irene, epitoli.

Okhulumela leli qembu unkk Khusela Diko uthi kulo mhlangano kumenyezelwe ukuthi kumele ubuholi besikhashana balezi zifundazwe buqokwe ngokushesha ukuze kusheshe kuhlale izingqungquthela zezifundazwe zokukhetha ubuholi. “Ukuqokwa ngokushesha kobuholi besikhashana kuzosiza ukubumba iqembu,” kusho unk Diko.

Kulo mhlangano leli qembu liphume likhuluma ngazwi linye ngokubumba iqembu nokubuyisa isithunzi seqembu kubantu baseNingizimu Afrika.

Lesi sigungu siphinde sancoma ngendlela ohambe ngayo umcimbi womgubho wokuqeda iminyaka eyi-106 I-ANC yabakhona, obuseEast London, e-eastern Cape ngomgqibelo owedlule.

Kulo mhlangano kuphinde kwaqokwa namalungu e- national

working comittee yaleli qembu. Kula malungu kubalwa UNKK Nkosazana Dlamini-zuma, unkz Lindiwe Sisulu, unkk Naledi Pandor, umnu Jeff Radebe, unkk Angie Motshekga, umnu Derek Hanekom, unkk Edna Molewa, unkz Thoko Didiza, unkk Nomvula Mokonyane, umnu Nathi Mthethwa, umnu Ronald Lamola, unkk Tina Joemat-pettersson, umnu Dakota Legoete, umnu Senzo Mchunu, umnu Zizi Kodwa, umnu Tony Yengeni, unkk Bathabile Dlamini, unkk Nomaindia Mfeketo, unkk Barbara Creecy nonkk Thandi Modise.

Ngokwemibiko esabalale emithonjeni yabezindaba, kuwona lo mhlangano wesigungu esiphezulu kudingidwe ngesiphakamiso sokuba umengameli Jacob Zuma ehle esikhundleni.

Kuthiwa isigungu esiphezulu siqoke ithimba elizoqhamuka nesu lokuthi umengameli Zuma agcine eshenxile esikhundleni. Phambilini umengameli waleli qembu umnu Cyril Ramaphosa ubambe umhlangano nomnu Zuma kodwa kugcine ingaphumanga imininingwane egcwele ngalo mhlangano.

Unobhala Jikelele WE-ANC umnu Ace Magashule ukuphikile ukuthi idingidiwe eyesiphakamiso sokuhoxiswa kukamnu Zuma kwesokungamela izwe.