Kubhekwe ekacash Flow
Incwadi iqukethe ezinohlonze ngosaziwayo
KUBIKWA ukuthi iqukethe izindaba ezishaqisayo ezithinta nosaziwayo abaningi incwadi ebhalwe ngujabulani Ngcobo odume kwabaningi ngeli-kacash Flow.
Lo somabhizinisi ozakhele igama ngamaphathi ezinga eliphezulu uzalwa ecleremont, ethekwini kanti kuthiwa le ncwadi yakhe ebizwa ngokuthi The Truth Behind Cash Flow izoshiya abanye beswele umgodi wokucasha.
Leli phephandaba lithole lokhu kwabasondelene naye. Phakathi kwezinto okubikwa ukuthi ziqukethwe yile ncwadi, wubudlelwane bakhe nosaziwayo abathile, ukungena kwakhe ebhizinisi lokuhweba ngamasheya ( forex), nokuduma kwakhe ngemuva kokwenza umcimbi okuthiwa wadla imali engaphezulu kwesigidi samarandi, owawuhanjelwe ngosaziwayo abahlukene.
Lo mcimbi wakhe yiwona ombeke emehlweni abaningi, waphinde wamdonsela amanzi ngomsele, wangena enkingeni waphenywa ngabomthetho njengoba ibhizinisi lakhe bekuthiwa yibhanoyi.
Ngemuva kwalokho iwile inkampani yakhe eyase izakhele igama ethekwini, wabe esefudukela egoli.
Kuzokhumbuleka-ke ukuthi nangonyaka odlule wenze isiphihli somcimbi obuhanjelwe ngosaziwayo abahlukene, lapho ethe ubungaza ukuphuma phambili emacaleni ahlanganisa elokuntshontsha, ukukhwabanisa nokushintshisana ngemali ngendlela engekho emthethweni.
Uvumile kuleli phephandaba ukuthi incwadi uyibhala ngokubambisana nomngani wakhe ophinde abe ngumbhali wezincwadi usoweto Mandlanzi, wathi izophuma ngomba- sa (April).
“Ngibone kubalulekile ukuba ngikhulume iqiniso linjengoba linjalo ngempilo yami.
"Kuningi-ke engizokhuluma ngakho kule ncwadi kusukela ekukhuleni kwami, wukusungula kwami ibhizinisi lokuhweba, yizingqinamba ezahlukene engibhekene nazo, yingcindezi engiyithole ezinhlakeni ezahlukene zezezimali nokunye okuningi,” kusho yena.
Uthi kuyo le ncwadi uphinde adalule ngobudlelwano bakhe nosaziwayo abahlukene abanye babo ababehambele umcimbi wakhe wezigidi okwakukhona kuwona nowinnie Ntshaba, Dumisani Bhebhe, Khanyi Mbau nabanye.
Umandlanzi uthi kuliqiniso ukuthi kukhona abazonyatheleka amakhona ngale ncwadi.