Umatasa neziqu zobumeli ovelele kwi-cricket
UKHULELE emndenini ozifelayo ngezemidlalo ulungisani “Lungi” Ngidi osematheni kulezi zinsuku kulandela ukwenza kahle kwakhe kwikhilikithi lomhlaba.
Ulungi uzalwa ngujerome Ngidi nobongi Ngidi.
Uyise wayengumgadli egijima unombolo 11 esakhula kanti wabuya kwinhlolokhono ye-orlando Pirates ngesikhathi kusadlala upatson “Sparks” Banda kodwa izinto kazaze zalunga.
Ulungi uzalwa nezinsizwa eziyisihlanu kanti yena unguthunjana kubo.
Abafowabo ngunhlanhla, usandile, upiwe, usihle nosphe. Uzalelwe est Mary’s Hospital edume ngeroma, emarrianhill, mhla zingama-29 kundasa (March) we-1996.
Uqale imfundo yamabanga aphansi ekloof Pre-primary wadlulela, ekloof Junior Primary lapho kusebenza khona abazali bakhe, bangabasizi kulesi sikole.
Uphume ekloof Junior Primary waya ekloof Senior wabe esedlulela ehighbury ngaphambi kokuya ehilton College, emgungundlovu, lapho ephothule khona ugrade 12.
Wenza unyaka wokugcina kwiziqu zomthetho e-university of Pretoria.
Imfundo yakhe yonke uyenze ezikoleni zomntakabani ngosizo lomfundaze ngenxa yokuvelela kwezemidlalo.
Nakuba efunde ezikoleni zasesilungwini kodwa isizulu usikhuluma phaqa okuyinto ejabulisa abazali bakhe. Esakhula ubenza imidlalo eyahlukene okuhlanganisa ibhola lezinyawo, ikhilikithi, ukubhukuda, ezokugijima nebhola lombhoxo.
Eminye imidlalo ugcine eyiyekile wagxila kwikhilikithi. Ngeledlule ugile izimanga enza ama- wicket ayisi-7 iproteas ihlula i-india. Uqokwe njengomdlali ovelele.
Ukwenza kahle kwakhe kumenze waba ngundabamlonyeni kwezemidlalo emhlabeni. Uqale ukukhombisa ithalente kulo mdlalo eqokelwa eqenjini lesizwe likaU/19 ngowezi-2013 esafunda ehilton.
Uma engadlali kwiproteas usuke egijima eqenjini lakhe lakuleli, ititans yasegauteng ayijoyine ngesikhathi eshiya isunfoil Dolphins yakwazulu-natal. Ingxoxo kangidi NELANGA
Langesonto ngempilo yakhe yaNgaphandle kwenkundla ihambe kanje:
ILANGA Langesonto: Ungumuntu onjani?
Ngidi: Ngizithobile, kangiyikhonzile impilo ewubukhazikhazi.
ILANGA Langesonto: Usichitha kanjani isikhathi sakho?
Ngidi: Ngiyazihlalela nje, ngiphumuze igazi. Umuntu engihlala naye kakhulu njengoba ngikude nasekhaya ngumsovo Baloyi waseLimpopo esidlala naye kwititans.
ILANGA Langesonto: Unazo izingane? Ngidi: Kangikabi nazo futhi kangikabi naye ngisho nomuntu engihlekisana naye. Ngisagxile kakhulu ekwakheni ikusasa lami kwikhilikithi nokuqedela izifundo zami ukuze ngijabulise abazali bami.
ILANGA Langesonto: Yini eyokuqala oyenza uma uvuka ekuseni?
Ngidi: Ngiyageza bese ngiya ejimini.
ILANGA Langesonto: Uhamba nganhloboni yemoto?
Ngidi: Ngizothenga i-audi A3 ungakapheli lo nyaka kodwa imoto engiyithanda kakhulu yimercedes i-a45 AMG. (Nokho leli phephandaba lithole ukuthi usehamba ngayo i-audi kodwa akakafiki ngayo ukuzoyethula kubazali).
ILANGA Langesonto: Sikhona isipho osuke wasipha abazali
bakho? Ngidi: Zikhona futhi ziningi. Ngisanda kubathengela umuzi evillage, ethekwini, kanti ngiyaqinisekisa ukuthi bahlala bejabule ngaso sonke isikhathi.
ILANGA Langesonto: Lukhona uhlelo oluthandayo kumabonakude? Ngidi: KWITV ngikhonze kakhulu ezemidlalo. ILANGA Langesonto: Uthanda
hlobo luni lomculo?
Ngidi: Ngiyazifela nge- hip hop yakuleli. Umculi engimthandayo ngumkhonzeni Langa odume ngelikaprofessor nokwesta.
ILANGA Langesonto: Ikhona ikilabhu yebhola oyithandayo yakuleli noma phesheya kwezilwandle?
Ngidi: Ngithanda i-orlando Pirates kanti phesheya ngithanda ichelsea. Nokho ibhola lebucs kaligculisi muva nje.
ILANGA Langesonto: Ubani umuntu noma umdlali obukela kuyena?
Ngidi: Ngibukela kubazali bami, bayikhona konke empilweni yami. Yize bekunzima sikhula kodwa basebenze ngokuzikhandla ukuze umndeni uphile kangcono. Umdlali engibukela kuyena nguNqobisizwe Minentle “Mox” Mxoli weblue Bulls yasegauteng. Lo mdlali uyazimisela kukho konke akwenzayo. ILANGA Langesonto: Yiliphi izwe ofisa ukulivakashela? Ngidi: Yiwest Indies, iyangichaza
indlela abadlali bakhona abadlala ngayo. Ngiyafisa ukuya khona ngiyothola imfihlo yabo.
ILANGA Langesonto: Yisiphi isilwane osithandayo nosesabayo?
Ngidi: Ngithanda inkosi yezilwane, ibhubesi. Ngithanda ubuchule balo nokuzimisela uma kukhona into eliyifunayo kanti ngiyayesaba inyoka. ILANGA Langesonto: Uthanda
umbala onjani? Ngidi: Obomvu.
ILANGA Langesonto: Uthini umyalezo wakho entsheni?
Ngidi: Kufanele izimisele kwekwenzayo. Kumele yazi ukuthi yonke into iyasetshenzelwa. Impilo kayifani nemana.
ILANGA Langesonto: Uma ungaba ngumengameli wezwe yini ongayenza?
Ngidi: Ngingathuthukisa umdlalo wekhilikithi. Baningi abantu abawuthandayo kodwa abangalitholi ithuba ngenxa yokuthi
kawuthuthukiswa ngendlela eqondile, nezinkundla kazikho ezindaweni zabampisholo okuyiyona nselelo enkulu ababhekene nayo.
ILANGA Langesonto: Ufisa ukuzibona ukuphi eminyakeni eyisihlanu ezayo?
Ngidi: Nginesifiso sokusimenda indawo kwiproteas, ngingakujabulela ukudlala nokagiso Rabada naye osanda kwenza umlando kuleli qembu.