UCHAZA NGEMINJUNJU YOKUSHIYA I-PIRATES
UCHAZA ngobunjunju bokushiya i-orlando Pirates akhule ezifela ngayo utshepo Gumede oyisitobha secape Town City ebidudulana nomkhaya i-ajax Cape Town izolo ngomgqibelo.
Ugumede uthi kuphoqeleke ukuba athathe isinqumo esinzima empilweni yakhe sokushiya ibucs ajoyine icity ebibunjwa kabusha ngemuva kokuba ujohn Comitis ethenge ilungelo lokudlala kwi-absa Premiership leMpumalanga Black Aces eminyakeni emibili edlule.
Lo mdlali uthi ukhule ezifela ngebucs futhi ubeyihambela imidlalo yayo yasekhaya esakhula.
“Ngijabule kakhulu ngesikhathi ngijoyina ibucs ngisuka kwiplatinum Stars.
"Okwenze ngajabula kakhulu wukuthi ipirates bengiyihambela imidlalo yayo nabangani bami bangasekhaya edobsonville. Bewumnandi umuzwa wokuthi sengiwumdlali wekilabhu ebengihlala ezihlweleni ngiyibuke idlala.
“Ukukhuhla ibhentshi kunge- nze ngathatha isinqumo esinzima sokucela ukukhululwa kwibucs. Bengifuna ukuya ekilabhini ezonginika ithuba. Akusizi ukuba yingxenye yekilabhu enkulu kodwa uholele ukuthi uyajima nokukhuhla ibhentshi.
“Bekufana nokuthi ngiyagembula ngalesi sinqumo ngoba bekunamathuba okuthi icity idliwe yizembe njengoba ibisanda kubunjwa,” kusho lo mdlali othi kumnandi kakhulu ukuqeqeshwa ngubenni Mccarthy ozakhele olukhulu udumo engumgadli webafana Bafana wabuye wagijima emakilabhini adumile e-europe.
“Ubenni unolwazi olujulile ngonobhutshuzwayo. Ulandelwa ngabantu abaningi emhlabeni jikelele.
"Iningi labantu abebemthanda esadlala lisazifela ngaye namanje. Ukulandelwa kwakhe kwenza ukuthi imidlalo yethu ibukwe ngabantu abaningi.
"Lokhu kuzosivulela amathuba okuthi sibonwe ngamakilabhu aphesheya kwezilwandle,” kusho ugumede.