Alukho ushintsho oluza noramaphosa: DA
Umncwango uphinde wakhethwa kwesobuholi
“ALUKHO ushintsho azoza nalo umengameli omusha we-african National Congress (ANC), umnu Cyril Ramaphosa.”
Lawa ngamazwi omholi weDemocratic Alliance (DA) kuzwelonke, umnu Mmusi Maimane, awasho izolo emcimbini waleli qembu wokukhetha ubuholi balo Kwazulu-natal, obuse-olive Convention Centre.
Umnu Maimane onanelwe ngelikhulu ihlombe uthe alikho ithemba lokuthi angenza izinguquko kuhulumeni waleli zwe noma angaba ngumengameli wezwe ngoba yonke inkohlakalo ebiyinzeka ngesikhathi eseyiphini likamengameli ibiyenzeka phambi kwakhe eyibona. “Ubengakhuzi ngani ngesikhathi izinto zenzeka?
"Usezokhuza yini manje uma esekhethelwe ukuba ngumengameli?” kusho umnu Maimane.
“Thina njenge-da simele uquqaba lwabantu, asibheki ibala lomuntu nohlanga lwakhe, kepha sikhonela ukuqeda ububha kubantu bakithi.
"Siyiqembu elilandela umthethosisekelo wezwe. Sicela uqale umkhankaso wokuphemba amagatsha, silungiselele ukhetho olukhulu lowezi-2019, sithole amavoti amaningi.
"Asingabazi ukuthi sizoba nguhulumeni wabantu obhekele izidingo zabo,” kusho umnu Maimane.
Umnu Zwakele Mncwango ubuyiselwe esikhundleni sokuhola leli qembu esifundazweni ehlula umnu Emmanuel Mhlongo abesibanga naye lesi sikhundla. Kwesokuba ngusihlalo esifundazweni kunqobe umnu Francois Rodgers.
Okuhle izinhlanga zonke bezikhona, kunokubambisana kwathi noma sekushaya isikhathi sokuba kukhulume umholi wabo umnu Maimane kwezwakala inhlokomo yokumemukela.
I-DA yaba nomholi wayo wokuqala umnu Tony Leon, kwalandela unkk Helen Zille, njengoba sekungumnu Maimane.
Izimbangi ze-da beziyihlaba ziyihlikiza le nhlangano zithi ingeyabamhlophe kuphela, iqhuba izimfundiso zabo.
Ukukhethwa kukamnu Maimane kwenze zehla lezo zinsolo nakuba zingaphelile njengoba kusekhona abathi abantu abamnyama benziwa izichuse nje kule nhlangano ngabantu abamhlophe. knowledge.simelane@ilanganews. co.za