Kumiswe ifilimu engesiko lakwaxhosa
Ikumkani ithi bazophikisana nokusakazwa kwayo
ISHAYA phansi ngonyawo ikumkani yesizwe samaxhosa, uzwelonke Sigcawu, ithi bazolwa ngakho konke okusemandleni ukuphikisana nokusakazwa ema- cinema kwefilimu esuse umsindo esihloko sithi inxeba - The Wound.
Le filimu emayelana nesiko lokusokwa kwabafana entabeni bekufanele iqale ukusakazwa ema- cinema aseningizimu Afrika ngolwesihlanu kuleli sonto kodwa ngenxa yomsindo nokushuba kwesimo yagcina imisiwe.
Umnu Xolile Ndevu okhulumela ikumkani Sigcawu, engxoxweni abe nayo NELANGA Langesonto, uthe badinwe bagane unwabu ngenxa yalokho abakholwa wukuthi kuwukubukela phansi isiko labo.
“Inkosi ithukuthele kakhulu. Okudina kakhulu wukuthi abadidiyeli bale filimu bafuna ukuqhubeka nayo yize (inkosi) ingajabule ngayo.
"Sizolwa kuze kuphele amandla. Sithi wonke umuntu ozaziyo ukuthi ungumxhosa makasukume alwe nokusakazwa kwale filimu,” kuchaza yena.
Uthi obekumele kwenziwe ngabadidiyeli wukuyocela imvume enkosini, basho ukuthi bafisa ukwazi kabanzi ngaleli siko.
“Bekumele beze kwikumkani uma befisa ukubonakalisa into efana nalena.
"Thina kasingeni ezintweni zabelungu, kodwa bona bangena shi ezintweni zethu thina bamnyama.
"Kunezinto okungamele zivezwe, eziyigugu, njengoba kuke kwenzeke ngisho uma kubeletha omama.
"Ngeke sihlale sithule bedelela isiko lethu belidicilela phansi. Ikumkani enjani okumele idele isizwe sayo, idele nesiko layo?” kubuza umkhulumeni wekumkani.
Ngemuva kokuba kuqubuke umsindo, inu Metro ithe ngeke kusaqhutshekwa ukusakazwa kwale filimu ema- cinema ayo njengoba bekuhleliwe.
Ize yathi labo akade sebethenge amathikithi bazobuyiselwa imali noma babukiswe amanye amafilimu abawathandayo.
Abakwaster Kinekor nabo benze okufanayo ngesikhathi kusuka imibhikisho yalabo abebelwela ukuba ingatshengiswa.
Khona ngolwesihlanu le filimu iqokwe eminxeni eyisikhombisa kumasouth African Film and Television Award (SAFTA). Phambilini ihlomule ngezindondo eziyi-19 phesheya kwezilwandle, yaqokwa kumaOscar ngaphansi komunxa weBest Foreign Film.
Ngaphambi kosuku lokuba itshengiswe ema- cinema izinhlangano ezehlukene okubalwa kuzo iman and Boy Foundation (MBF) zibhikishele emahhovisi efilm and Publication Board (FPB) ecenturion epitoli, zifuna imiswe noma ihlelwe kabusha.