UFUNGA NGOKUSHIYA PHANSI I-1KZN TV UNOMKELEMANE
ONGUMDIDIYELI omkhulu wezinhlelo ZE-1KZN tv, okuyisiteshi sikamabonakude esizinze erichards Bay, ogwini olusenyakatho yekwazulu-natal uthi nanxa emuzwa ekhaleni umethuli wezinhlelo zabomdabu kulesi siteshi, unomkelemane Langa, ngeke bakwazi ukumkhokhela imali ayifunayo njengoba beyisiteshi esincane.
Umbiko ofike ngolwesihlanu uthi lo mdidiyeli ucele umhlangano ophuthumayo nolanga kanye nathula naye uhlelo oluthi ugubhu Lwami, umbali Gumede, kusasa ngomsombuluko.
Unomkelemane ubhale incwadi yokwesula emsebenzini kulo mabonakude, wayiqondisa kunkz Elize Viljoen, ongumdidiyeli wezinhlelo. Kule ncwadi ukhale ngokuthi useneminyaka engama-40 ubudala kanti unezingane azifundisayo ezimbheke emehlweni - kunzima ukuba aphile ngeholo eliwu-r7 300 ngenyanga.
“Uhlelo Ugubhu Lwami kanye nezingoma zomdabu yimi engalu- qala phansi, ngisho izingubo ezigqokwa khona, nayo yonke imihlobiso yalo kwaba wumqondo wami.
Ngalanda umbali Gumede ngonyaka wezi-2012 lwadlondlobala njengoba selunjena namuhla.
Ngu-elize owavula amathuba okuthi izinhlelo zethu zingene kusukela ngemisombuluko kuze kube ngolwesihlanu njalo kusukela ngehora lesithupha kuya kwelesikhombisa,” kusho unomkelemane.
Umfoka Langa ufuna isamba semali eyizi-r80 000 ngokwethula izinhlelo bese kuthi izi-r125 000 ngowokuphrojusa ngenyanga.
“Yiyo le mali engifanele, ngiyazi ukuthi kubo iyasinda kepha ayikho into engingayenza, isimo siyaphoqa. Ababukeli abalindele ukuthi zizoba khona izinhlelo kusukela ngomsombuluko kuze kuphele inyanga bese ngithi khumu,” kuphetha unomkelemane.
Unkz Veljoen ebuzwa ngokushiya kukalanga uthe: “Ngibuhlungu kabi ngokushiya kukanomkelemane. Unekhono eliyisimangaliso kanti nababukeli bayamthanda. Kepha asinayo le mali ayifunayo. Izizathu zisobala nje, siyisiteshi esincane esingenzi nzuzo kangako futhi sinezisebenzi eziningi, kuyahleshulelwana lokho okuncane esinakho. Ngeke sikwazi ukumkhokhela le mali ayifunayo.”
Umbali uthi uma unomkelemane eshiya emsebenzini kusho ukuthi naye umsebenzi uyamphelela.
“Ngingasala ngenzeni umdidiyeli wami owangilanda wangifundisa umsebenzi eseshiya? Ngifa naye lapho efa khona. Nami nginenkinga efana neyakhe.”