Balugubhe kanye kanye olokuzalwa
“UKUKHOLWA ukuqiniseka ngezinto ezingabonwayo kuthi lapho abantu bethi ngeke kwenzeke wena uthi kuzokwenzeka. Ukholo oluhle luveza izithelo ezinhle.”
Lena yintshumayelo eyethulwe ngumfundisi Psycology Lindokuhle Perfect Gumede, onguMengameli webandla i-united Congregational Church, KwazuluNatal, ayethule engonyameni, emlazi ngesonto.
Lapha bekuyinkonzo yokubongela umfu Bhekisipho BK Dludla (92), unkk Edna Msani (91), umnu John B Gumede (78), umnu Gabriella Mahlangu (63) nonkz Sibongile Makhanya (28), bonke abazalwa ngomasingana (January) ngeminyaka eyehlukene.
Kunqunywe ukuba bagubhe ndawonye njengabazalwane bebandla elilodwa. Umfu Gumede ucaphune ezincwadini ezintathu - ngekagenesisi 47, ivesi 1 kuya kwele-12; kweyamaheberu 11 ivesi 1 kuye evesini le-12; nekaluka 1 ivesi 39 kuya kwelama-56.
“Uma ungakholwa awukwazi ukumethemba unkulunkulu. Kulezi zincwadi esesizifundile sithola ukuthi ujosefa wadayiswa ngabafowabo, kwafika indlala ezweni lakubo baya egibhithe bamfica sekunguye ophethe lapho. Wababona abafowabo abamdayisa kepha wabaphatha kahle, akababambelanga amagqubu baze banikwa ngisho umsebenzi wokuba ngabelusi.
Sicela unkulunkulu asiphe izinhliziyo zokwedlulisa izinto ezenzeke kudala. Wena wenzenjani kubantu abakonile na? Ngisho usarah wakholwa yizwi, wathola umntwana esemdala. Masibe nokholo olucisha umlilo ovutha amalangabi asuke evutha ezinhliziyweni zethu,” kusho umfu Gumede osemncane ngeminyaka.
Uqhubeke wathi: “Uma uyikholwa kumele ube nesibindi. Asedlule ekusonteni bazalwane, asingakholwa uma sisezindlini zamasonto sithi singafika emakhaya siyikhumule ingubo yokukholwa.
"Ngikhuluma nje, kukhona okuthi uma bengekho emakhaya abo abasele bathokoze bathi “saphumula”.
Akukuhle lokho, kugqoke ukukholwa uhambe nakho emsebenzini, nasezindaweni zonke abantu babone ukuthi uhambisa okwakhe omkhonzayo okungujesu Krestu, Ameni.”
“Umoya Oyingcwele uyakulawula kunoma yini oyenzayo noyishoyo. U-elizabeth wahlangana nomaria bekhulelwe, wezwa kugxuma umntwana esiswini, ezwa umoya oyingcwele owawuthwele ngumaria.
Uma unomoya oyingcwele uyamsefa umuntu ongalungile. Kulezi zinsuku siphila nabantu abagcwele umoya wodumo, abashumayela ngoba befuna udumo lukankulunkulu. Kuze kube khona abazishaya izifuba bethi banebandla, ubezwe bethi “yibandla lami” besho ibandla likajesu,” kuphetha umfu Gumede.
Kufakaze unkk Nono Dhlomo obehamba nomyeni wakhe ongungqongqoshe wezempilo Kwazulu-natal, udkt Sibongiseni Dhlomo. Utshele amakholwa ukuthi liqinisile izwi, ivangeli likakrestu limenzele izimanga, konke ayikho kungenxa yalo.
Nodkt Dhlomo ubongele abebegubha usuku lwabo lokuzalwa, wabapha izipho wagcizelela ukubaluleka kokuhlala enkosini. Uke wanyakazisa ibandla esukuma ehuba, kwacaca ukuthi ngumntwana okhuliswe ngevangeli.
Ugcizelele ukuthi kubalulekile ukunakekelwa kwabantu abadala ngoba baphethe amagugu nomlando. Unkk Msane ubonge izingane zakhe okuyizona ezimenzele umcimbi zase zihlanganisa bonke abazalwa ngale nyanga ngaphandle kokubandlulula kwaba mnandi.
Umfu Dludla usukume wabonga unkulunkulu ngokuthi nanxa eneminyaka engama-92 ubudala, kepha usahleka ngawo wonke amazinyo akhe futhi akaguli ndawo yikhona nje ukuthi usekhulile.
Uze washo nokuthi uneqhaza alibamba enkululekweni yezwe ngoba nguyena owatshela umnu P.W Botha owayengumengameli wezwe ngaleso sikhathi ukuba akhulule umnu Nelson Mandela, aqede ubandlululo.
Sikuqaphelile ukuthi kuleli bandla isikhathi siyagcinwa kanti nomfundisi ofunde izwi uhlale izithonto engqikithini yentshumayelo, akankantanga, kuyasho ukuthi wayifunda indlela yokufingqa esikoleni sebhayibheli ebizwa nge” homiletics”.
Inkonzo ihamba ngokohlelo olulotshwe phansi, ngisho amaculo namavesi azofundwa.
Kube sekusikwa ikhekhe baculelwa ingoma yosuku lokuzalwa kwafinywa ngendololwane.