SIVULA AMEHLO ABACULI:
AKUSIWO umqondo omuhle ukuzenzela lonke uhlelo lokuqoshwa komculo esitudyo, engekho okubhekile, onguphrojusa, kumbe ozoba yiso.
Kuyenzeka umuntu ngenxa yokuthi usesebenze iminyaka eminingi emculweni, kumbe unolwazi lonke bese ecabanga ukuthi kulula ukuzenzela. Abanye basuke bexinwe yisimo sezimali bese bezama ukonga izindleko kanti bayazilimaza.
Ngisho umuntu angahlakanipha aphuze amanzi ngemfologo ngeke akwazi ukubona amanye amaphutha akhe nawakanjiniyela uma kuqoshwa. Kubalulekile ukuthi noma umculi engenayo imali kodwa azame ukuthola ozoba yindlebe emsebenzini wakhe.
Kusizani ukuba umuntu ajahe ukukhipha umsebenzi athi eseqedile ususemakethe kutholakale ukuthi ukudla akuphekile akuvuthiwe, kumele kubuyiselwe ebhodweni.
Baningi abaculi esibaziyo asebekhokhe cishe imali eshisiwe belokhu besuka kulesi studyo baye kwesinye emuva kokuba umsebenzi wabo usuphumile sekuzwakala ukuthi uyimfeketho. Ukuba lowo mculi wayevele waqongelela imali walinda wathola abantu abawaziyo umsebenzi ubezokhokha kube kanye.
Kubalulekile ukuba umculi athole uqweqwe lukaphrojusa osenamagalelo aziwayo nosewake wakhipha abaculi, wazuza izindondo - lokho kuzomsiza.
Phela ukusebenza nophrojusa onegama kusiza ekutheni nezinkampani ezisabalalisa umculo ( distributors) zisheshe ziwuthathe lowo msebenzi ngoba zimethemba.
Uphrojusa osemnkantshubomvu akawubambi umshini uma kunamaphutha, uyawazi umthetho omkhulu wokuqopha othi: “Alikho iphutha elincane, makhulu onke.”
Bayazi omakadebona kwezomculo ukuthi uma kuqoshwa kuhlanganiswa iculo kujuluka ikhala, akudlalwa ngoba kusuke kulindeleke ukuba kukhishwe umpe lodwa. Umculi unalo ilungelo lo- kwenza izivumelwano nophrojusa ngodaba lokukhokhelana kunokuba akhiphe inhlakanhlaka amanyal’omthini.
Ukuba khona kukaphrojusa estudyo kulekelela ekwehliseni izindleko nokongiwa kwesikhathi ebesingachitheka umculi oqophayo abezosimosha ngokuba athi eseqophile aphinde ahlale phansi azilalele ukuthi ucule ngakho yini.
Cabanga-ke lokho kuzokwenzeka eculweni ngalinye, kusazomele alalele ukuthi iphimbo lakhe belikahle, izinsimbi zihlangene, isipidi sengoma sikahle yini nokunye.
Phela onjiniyela bayakuthokozela ukuchithwa kwesikhathi ngoba basuke bebhala imali bengenandaba. Benjalo nje onjiniyela abangathembekile bayakwazi ukuba baqambe amanga bethi kukhona amaphutha benzela kuhambe isikhathi.
Konke lokho uphrojusa uyakwazi ukukunqanda kungenzeki.
Kufuneka uphrojusa ozaziyo izinhlobo zemisindo nomculo jikelele, ongafuniseli.
Kuyadumaza ukuzwa umculi ekhipha ingoma efana neyomunye ekubeni bekufanele uphrojusa akuzwe lokho ingakaqoshwa. Uma umuntu enguphrojusa kumele alalele imisakazo nomabonakude, azazi izingoma zabanye abaculi. knowledge.simelane@ilanganews. co.za