Kubhekwe eyokuvulwa kwephalamende
Umhlaziyi uthi ngeke isale eyamathuba emisebenzi
ZININGI izindaba ezisematheni kuleli lizwe okubhekwe ukuba zivele enkulumweni kamengameli wezwe azoyethula emcimbini wokuvulwa kwephalamende ngolwesine esiya kulo.
Lokhu kuvulwa kwephalamende kuza emuva kokuphela kwehlandla lesibili nobekungelokugcina umengameli Jacob Zuma ehola ukhongolose, aliphothule engqungqutheleni ebingozibandlela (December) ngowezi-2017, kanti elokuba ngumengameli wezwe liphela ngowezi-2019.
Umnu Cyril Ramaphosa okhethelwe esokwengamela ukhongolose futhi ebe eyiphini likamengameli wezwe uthatha lesi sikhundla ngesikhathi uhulumeni waleli zwe uphansi kwefu lenkohlakalo.
Khona lapho kusabalele nezinkulumo ezithi akukacaci ukuthi le nkulumo ingase yethulwe ngubani uma iqina indaba yokuvuswa kwamacala ayebhekene nawo umnu Jacob Zuma kodwa ahoxiswa ngumshushisi ngowe-2009.
Iphalamende livulwa njena zimapeketwane izinto. Ezindabeni ezihamba phambili ezingakasombululwa kubalwa ukungenzi kahle kwezinkampani zikahulumeni (SOES), ikakhulukazi eyakwaEskom edinga ukutakulwa ngezigidigidi zamarandi, yinkohlakalo ekhungethe lonke izwe; yimfundo yamahhala ezikhungweni zemfundo ephakeme nodaba oluphuthumayo lokuphela kwamanzi ikakhulukazi ecape Town lapho izakhiwo zephalamende zikhona.
Kuningi osekushiwo ngabahlaziyi bezepolitiki emithonjeni yabezindaba mayelana nokumele kulindelwe enkulumweni kamengameli nalokho abanezinsolo eziqinile zokuthi umengameli uzohambela kude nakho. ILANGA Langesonto like laxhumana nosolwazi Bantubonke Dumisa wasenyuvesi yakwazuluNatal ukuba ake asike elijikayo ngokuthi ingase ihambe ngamuphi umzila inkulumo yesizwe.
Uthe kungeke kwathiwa kunokuqagela ngenxa yokuba khona kwenqubo eyaziwayo nelandelwayo ekuhlanganisweni kwenkulumo yesizwe kamengameli.
Esontweni lokuqala kunhlolanja (February) kuye kube nomhlangano wekhabhinethi nezinhloko zeminyango kahulumeni obizwa ngelekgotla wona owandulelwa yilowo wetechnical Team.
Umengameli ubuye abheke nezinqumo ezivela esitatimenteni sengqungquthela yokukhetha ubuholi.
Lokhu kuhlelwa kubukwa umbiko waphakathi nonyaka mayelana nokusetshenziswa kwezimali, owethulwa ngungqongqoshe wezimali ngomfumfu (October).
Sekuhlangene konke lokhu kuyasiveza isithombe sokuthi ingase ime kanjani inkulumo kamengameli.
Usol Dumisa uqhubeke wathi kuvamile ukuthi kube nezinto ezishiwoyo eziyiziqubulo abaholi abazisho ngoba zikitaza izindlebe zoquqaba noma labo abayizishoshovu kodwa okuthi nxa sekuhlalwa phansi zicutshungulwa bese kungahambi kalula njengoba kushiwo.
Wenze isibonelo ngodaba olusematheni lokudla umhlaba ngaphandle kokuba anxeshezelwe lowo othathwa kuye.
Uthe uma usifundisisa isinqumo sengqungquthela kakhongolose maqondana naleli phuzu, uyothola ukuthi indaba ayipheleli esiqubulweni esivusa amadlingozi.
Siyedlula sibalule nendaba ethi lokho okwenziwayo kuyomele kwenziwe ngendlela, phakathi kokunye, engakuphazamisi ukuphepha kwesizwe endlaleni (food security).
Kuya ngomengameli-ke owethula inkulumo, kuba khona izihloko azigcizelelayo kunezinye.
Okunye futhi okungase kuvele kule nkulumo yindaba yokukhulisa umnotho ukuze kubhekwane nenkinga yokusweleka kwemisebenzi.
Uma kungenzeka kube ngumnu Cyril Ramaphosa ongase ethule le nkulumo, angase ezwakale egxilisa lezo zingxenye akade enza izethe-mbiso ngazo ngenkathi esakhanka-sela isikhundla sokuhola iqembu elibusayo.
Phakathi kwalezo zinto iyo leyo ndaba yokulwa nenkohlakalo phela, nokulungisa umonakalo osezinkampanini zikahulumeni ukuze abatshalizimali bamazwe angaphandle nakuleli basondele kufukuleke umnotho waleli zwe.
Ngaphezu kwalokhu umengameli uzogcizelela indaba yokuqinisa imisebenzi yengqalasizinda njengelinye lamasu okudala amathuba emisebenzi.
Okunye phakathi kwezinto isizwe okumele sizilindele kule nkulumo wukuthi ukuntenga komnotho kusho ukuthi maduze nje singase simuzwe uhulumeni eseshumayeza isizwe ivangeli lokuba sizibophe ngesifociya ukuze ukwazi (uhulumeni) ukutakula umnotho ngokuthi kube nezinhlelo ezimiswayo kumbe kuncishiswe imali efakwa kuzo.
Kwelemfundo ephakeme yamahhala, usol Dumisa uthi akukhathalekile ukuthi ozokwethula inkulumo ngubani kodwa okungase kubikelwe isizwe wukuthi lolu daba lubhekwe yikomiti lezipha-thimandla zamanyuvesi nokuyilona elizokwethula umbiko ngokuthi imfundo yamahhala kungenzeka yini itholakale kuleli zwe.
Nakuba udaba lokuphela kwamanzi ekapa lusezandleni zikamasipala omkhulu wasecape Town, nokho kungase kube khona azokusho umengameli ngalo.