Ukhumbula izinsuku esenguweta e-emperors NGAPHANDLE KWENKUNDLA:
KUVUKA umlando wokuba nguweta kulinda Onassis “Figo” Mntambo (28) osanda kusayiniswa yichippa United ngokuqala kwalo nyaka esuka kwijomo Cosmos egijima kwinational First Division (NFD).
Lo mdlali ubenguweta ngesikhathi imamelodi Sundowns inqoba icastle Premiership ngowezi-2005/2006.
Ubesebenza e-emperors Palace, ekempton Park, lapho amasandawana abelele khona emuva kokunqoba. Uthi akasikhohlwa lesi sikhathi eweta idowns.
Uthi wakubeka kwacaca kumfowabo ukuthi ngelinye ilanga (umfowabo) uyoweta yena esegijima kwi-absa Premiership.
Ufunde amabanga aphansi elenasia Model Primary ngaphambi kokudlulela etrinity Secondary School, elenasia.
Udabuka ediepkloof, esoweto. Uqale ukudlala ibhola kwireal Madrid.
Ngesikhathi esagijima kwilenasia Primary, ube ngundabizekwayo ewola imiklomelo yokuvelela okwenza ngesikhathi esedlulela etrinity wafika nakhona wayisilomo ngebhola.
Uzakhele igama ekhulumisa ibhola kwimahlobo Festival Games ngowezi-2008 ngaphambi kokubuyela emsebenzini ngomasingana (January) enkampanini yepackaging, egoli.
Uthi ukhumbula kahle ngesikhathi elele nesinqandamathe sakhe ekubeka kucaca ukuthi akasalubhadi emsebenzini.
Uveze ukuthi waheha iso leroses United ebiphethwe ngusinky Mnisi ngesikhathi esadlala kwiBlack Poison ebicijwa ngurhulani Mokwena oseyisekela likamilutin “Micho” Sredojevic ololonga i-orlando Pirates.
Ingxoxo kamntambo NELANGA
Langesonto ngempilo yakhe yangaphandle kwenkundla ihambe kanje:
ILANGA Langesonto: Ungumuntu onjani?
Mntambo: Ngikhonze ukuzihlekela. Ngiyakuthanda ukuzihlalela nomndeni wami noma umlingani wami, umxolisi Macuphu. Kangimusukeli umuntu. Nokho njengendoda ngiyakwazi ukuzilwela nxa kunesidingo.
ILANGA Langesonto: Ubukela kubani?
Mntambo: Ngikhule ngithanda ujohn “Shoes” Moshoeu (obeyisolomo kunobhutshuzwayo wakuleli). Ubekwenza konke enkundleni ngesikhathi esadlala ibhola. Ibingichaza indlela abelikhulumisa ngayo ibhola. Empeleni ngiphuma emndenini othanda ibhola ikakhulukazi, i-orlando Pirates. Umkhulu wami, upower Mntambo, ungomunye wabasunguli bamaBhakabhaka.
ILANGA Langesonto: Uthanda nhloboni yokudla?
Mntambo: Ngizifela nge- pasta ne- macarroni. Okunye ukudla engikukhonzile yinyama yangaphakathi futhi sengiyitholile indawo eyithengisayo ebhayi. Ngenhlanhla enkulu isinqandamathe sami, utsakani Chauke, siyakwazi ukungiphekela ukudla okwehla esiphundu.
ILANGA Langesonto: Wenzani ukuchitha isizungu?
Mntambo: Kangiyena umuntu okhonze ukuzula. Njengoba bengisafika ebhayi bengizihlalela nje eblue Water Bay. Nokho sengiyitholile indawo ezokwanela umndeni wami.
ILANGA Langesonto: Ikhona yini incwadi oyifundayo?
Mntambo: Ngisanda kuphothula incwadi kateko Modise (The Curse). Inomlando omuhle walo mdlali. Into engishaye ngaphakathi kuyona wukuphumela kwakhe obala ngezimo ezahlukene abhekane nazo empilweni yakhe kulo mdlalo okuyinto iningi lethu elesabayo ukugonyuluka ngayo emphakathini. Yingakho-ke ngimethulela isigqoko uteko.
ILANGA Langesonto: Usushadelwe?
Mntambo: Yebo, nokho sekusele umshado omhlophe. Ngibusiswe ngezingane ezimbili, ulindokuhle Chauke oneminyaka eyisi-7 nonkosinathi Chauke onezinyanga eziyisi-9.
ILANGA Langesonto: Nibangaki kwenu?
Mntambo: Sibane nje kuphela, amantombazane amabili unonhlanhla noprudence asebashona bese kuba unorman kugcine mina. Umama ngunomasonto Mntambo. Ubaba ulungile Mthiyane kanti yena usadlula emhlabeni.
ILANGA Langesonto: Sikhona isipho oke wasipha abazali bakho?
Mntambo: Kuningi esengibenzele khona. Izidingo zasekhaya zihlale ziseqhulwini kimina emuva kokuhola.
Ngikhuluma nawe nje ngibuya esikhumulweni sezindiza ukuyobhukha ibhanoyi lokuthi umama azosibuka nxa sesidlala ne-orlando Pirates.
Phela uwathanda womabili la makilabhu.
ILANGA Langesonto: Iyiphi imoto oyithandayo?
Mntambo: YIBMW 3 series kwazise ikwenza konke emgwaqeni.
ILANGA Langesonto: Ulalela muphi umculo?
Mntambo: YI-RNB ikakhulukazi uluther Vandross. Umculo wakhe ugijimisa igazi lami kamnandi.
ILANGA Langesonto: Yini eyokuqala oyenzayo uma uvuka ekuseni?
Mntambo: Ukugeza amazinyo bese ngibheka umndeni ukuthi uyaphila yini.
ILANGA Langesonto: Yisiphi isilwane osithandayo?
Mntambo: Ngikhonze izinja. Kuyimanje ngikhumbula ezasekhaya ezimbili.
ILANGA Langesonto: Ukhona ezinkundleni zokuxhumana?
Mntambo: Yebo, ngisebenzisa kakhulu ifacebook ne-instagram, kanti ngiphatha ucingo lwakwaSamsung.
ILANGA Langesonto: Lukhona uhlelo oluthandayo kumabonakude?
Mntambo: Yisibaya. Ngiwukhonzile lo mdlalo kwazise kuningi esikufundayo kuwona.
ILANGA Langesonto: Usebenzisa siphi isiqholo?
Mntambo: Yipaco Rabanne 1-million. Ingiphatha kahle kakhulu.
ILANGA Langesonto: Yiliphi izwe osafisa ukulivakashela?
Mntambo: Ngifisa ukuya espain kumbe e-england maduzane.
ILANGA Langesonto: Ikhona ikilabhu yebhola oyithandayo?
Mntambo: Ngithanda i-orlando Pirates. Okungijabulisayo wukuthi yake yangifuna kodwa kangaze ngayijoyina kwazise udkt Ephraim “Jomo” Sono wabona ngingakaqini kahle ukhakhayi.
ILANGA Langesonto: Uthanda umbala onjani futhi ukuthandani ukubeka isikhindi esiswini?
Mntambo: Ngithanda umbala omhlophe ngoba ugqamile. Okwesikhindi kuyiqiniso, ngikufunde kutebogo Makobela ebesidlala naye sisakhula.
ILANGA Langesonto: Uma ungaba ngumengameli wezwe yini ongayenza?
Mntambo: Wukujika isimo sezemfundo. Ngiyafisa ukuthi uhulumeni ubhekane ngqo nesimo sokunyusa izinga lemfundo.
ILANGA Langesonto: Uzibona ukuphi eminyakeni eyisihlanu ezayo?
Mntambo: Ngenhlanhla enkulu ngangiphiwe esikoleni. Ngathola u-a kwi-accounting kanti kwiMathematics ngathola u-b. Ngihlela ukwenza izifundo zokucwaninga amabhuku maduzane.
ILANGA Langesonto: Uthini umyalezo wakho entsheni?
Mntambo: Konke empilweni kumele ukulwele, akutholakali kalula.
Ukubekezela kumqoka kumuntu ofuna ukuphumelela. Kumele intsha isikhuthalele isikole.