ESKHALENI:
KUQINISA idolo ngekusasa likanobhutshuzwayo waseningizimu Afrika ukuqhamuka kwegama likatokyo Sexwale kubantu abangase baphonsele udanny Jordaan inselelo ngesikhundla sokwengamela isouth African Football Association (Safa).
Isafa imemezele ukuthi ukhetho lwale nhlangano isilusondezela umgqibelo womhla wama-24 kuNdasa (March). Kakudingi bungoti ukubona ukuthi lolu khetho lusondezwe ngamabomu ukuvuna ubuholi obukhona njengamanje kwiSafa ebukeka inabaholi abangenza noma yini ukuqhubeka nokuqhoqhobala izintambo.
Ngokwami, isafa ibhacaze kakhulu ngaphansi kobuholi bukaJordaan onomlando wokuba kule nhlangano iminyakanyaka. Phela yingaphansi kwalo mholi lapho isafa ibulale unobhutshuzwayo ethekwini.
Itheku liyisifunda esikhulu ku- nazo zonke Kwazulu-natal.
Isono sesafa ethekwini kube wukuphuma kwabaholi bayo enkanjini yefootball Transformation Forum (FTF) okuyiyona ebeke ujordaan emandleni.
Ujordaan cishe abanikazi abaningi bamakilabhu ama-amesha asethekwini bazomkhumbula ngosizi abadalele lona.
Kumanje isafa KZN ABC Motsepe League inamakilabhu ali-15 esikhundleni sali-16 ngenxa yombango wamandla oqhubeka ethekwini, ovutshelwe wubuholi bukajordaan.
Namanje ngiyazibuza ukuthi yini ehlule ujordaan ukuxazulula inkinga yasethekwini esithathe iminyaka emine kunobuholi obubili.
Kukhona obuholwa ngu-alpha Mchunu, obengamathe nolimi nojordaan kusungulwa IFTF, nobukamazwi Mkhize osebusenyongweni kajordaan njengamanje.
Nokho ubuholi bukamkhize namanje kabunazo izimoto njengoba zisasetshenziswa ngobukamchunu.
Muva nje nabo obukamkhize bunqindwe amandla njengoba ubuholi bukajordaan bunike ukwenzakwakhe Ngwenya igunya lokudidiyela imidlalo YESAB League kulesi sifunda egameni lesafa kuzwelonke.
Okubi-ke ngalokhu kuqokwa kukangwenya wukuthi abasebholeni bathi ubongwa ngalo msebenzi njengoba ejwayele ukubonakala eshayelela ujordaan nxa ehambele Kwazulu-natal. I-SAB League yisona sigaba esikhulu ezifundeni.
Yinto eyaziwa ngisho nayingane ekhasayo ukuthi impumelelo ye- Bafana Bafana ilele ekubeni khona kobudlelwano obuhle phakathi kwesafa nepremier Soccer League (PSL) ekhiqiza abadlali.
Ukukhohlisana ihlomile kwezikhulu zalezi zinhlangano kwenza ukuba ibafana ithwale kanzima ukuthola abadlali ebadingayo.
Yingakho nje ihlulwa nawukubamba iqhaza kwi-african Nations Championship (CHAN) ezosongwa namuhla emorocco.
Ngikholwa wukuthi usexwale angaba yisixazululo ezinkingeni zebafana kwazise unomlando wokuba nobudlelwano obuhle NEPSL njengoba phambilini ebeseka inational First Division (NFD) ngenkampani yakhe imvelaphanda Group.
Okunye okuhle ngosexwale wukuthi uvele ukhona ezinhlakeni zefederation of International Football Association (Fifa) eholwa ngugianni Infantino ongene esikhundleni sikasepp Blatter ophume kabi esegutshuzelwe yiphunga lenkohlakalo.
Usexwale uyahlala nakwiconfederation of African Football (Caf). Usexwale wethenjwa nayizinkakha zakudala zikanobhutshuzwayo okubalwa kuzona nolucas “Rhoo” Radebe ekutheni angakwazi ukufika noshintsho kwisafa.
Nokho konke kulele kubaholi bezifunda ukuqoka indoda ezohola ibhola lakuleli, okubi-ke nje wukuthi abanye sebakhandwa ukuba bacabange ngezisu ngaso sonke isikhathi.
zakhelem@ilanganews.co.za