U-CONTE USAZIMISELE NGOKUHLALA KWI-CHELSEA
UYAYICHITHA imibiko yokuthi ufuna ukudinsila umsebenzi u-antonio Conte ongumqeqeshi wechelsea eqhathwe newatford emdlalweni we-english Premiership kusasa ngomsombuluko ngo-22h00.
Lo mqeqeshi unqobise ichelsea indebe ye-english Premiership ngesizini edlule afike ngaphambi kokuqala kwayo.
Kulokhu itshe ligaya ngomunye umhlathi njengoba izinto zimuphika. Uconte usephumele obala ngokuthi kungenzeka ichelsea ingangeni kwi-uefa Champions League ngesizini ezayo. Kumanje isele ngamaphuzu ali-19 kwimanchester City eqhwakele.
Ichelsea inenebulwe yibournemouth ngo-3-0 kowe-premiership phakathi nesonto.
“Kangikaze ngithi ngifuna ukushiya, futhi abanikazi bekilabhu kabakaze bayikhulume eyokunqamula inkontileka yami. Engikwaziyo wukuthi ngisalelwe yizinyanga ezili-18 kwinkontileka yami nechelsea.
Into eyenza ikilabhu ingadlali kahle wukuthi kasibathenganga abadlali ngesikhathi kuvulwe iwindi. Kanginawo amandla okusayinisa abadlali njengoba lokho kwenziwa ngabanikazi bekilabhu,” kusho lo mqeqeshi odabuka e-italy.
Kuthiwa akasezwani kahle noroman Abramovich ongumnikazi wechelsea, kubangwa ukuthi lesi sikhulu siyathalalisa uma kufanele kuthengwe abadlali. Lo mqeqeshi uyakuchitha lokhu.
Uthi akathandi ukugxila ekukhulumeni ngoba umsebenzi wakhe kwichelsea wukucija abadlali. Uthi usathanda ukusebenza kwichelsea futhi uyafisa ukuba ivuselelwe inkontileka yakhe nale kilabhu yaselondon.