Kuyangihlukumeza ukuthi ingane yami kayazi yimina oyizalayo
NGAZALA INGANE YATHATHWA NGOMUNYE
PASTOR, ngathandana nosisi kanti kukhona ubaba athandana naye.
Kwahamba isikhathi wakubona lokho lo baba ngoba lo sisi engasathandi ukuhlangana naye ngokocansi. Ngamkhulelisa kodwa lo baba wahamba wayoyihlawula ingane yami.
Lo sisi wathi masifihle ukuze kuphephe ingane, wathi uzoyitshela uma isikhulile ukuthi izalwa yimina. Manje ngiyacabanga ukuthi uma kwenzeka unkulunkulu engithatha kuqala ngabe uzoyitshela yini. Ekhaya ngabazisa ngale ngane. Ngenzenjani ngoba ngikhathazekile?
IMPENDULO: Mfowethu ukhulumisa okwendoda. Kuhle kakhulu ukuthi abakini balwazi lolu daba, kodwa ngiyafisa nakubo kwentombazane ukuba balazi iqiniso.
Uma into isiyaziwa ngabantu abadala isuke isiphephile. Kukuwena ukuthi uyaqhubeka yini noma cha nalo muntu wesifazane kodwa ingane akufuneki ihlukumezeke ngenxa yobuthaka bethu.
Uma unesiqiniseko sokuthi ingane ngeyakho kufanele ingane ilazi lelo qiniso - ikhule imazi uyise nabantu bakubo. Abantu okumele balungise lolu daba ngabadala bakini nabakubo kwentombazane.
SIXABANA NJALO NOMKAMI
PASTOR, nginenkinga emshadweni wami, sixabana njalo nenkosikazi yami. Isindisiwe, mina ngikholelwa emadlozini. Ngidinga usizo lwakho.
IMPENDULO: Baba ngiyazwelana nawe enkingeni obhekene nayo engicabanga ukuthi iningi lethu libhekene nayo.
Uma sekunezinkinga ezifuze lezi emshadweni kumele sibabize abefundisi bethu - umfundisi wakho nowenkosikazi yakho. Izinkinga ezifuze lezi zisuke sezidinga bona abaphathi ukuba bangenelele.
Mhlawumbe singaqhamuka isisombululo sale nkinga uma ningahlangana nabo bobabili, nibike udaba lwenu. Uma kuyinina nje nobabili ngeke ixazululeke le nkinga. Uma nihluleka ukuthola usizo kubefundisi benu ni-ngithinte, akuyona inkinga enzima lena.
UYAPHINGA OWAKWAMI
PASTOR, ngineminyaka engama-20 sishadile kodwa izinto azihambi kahle emshadweni. Sengimbambe izikhathi eziningi ephinga manje sengicabanga ukumshiya.
Indodana yethu yenza unyaka wesithathu enyuvesi, ithi icela ukuba ngilinde ngingahambi ize iqede enyuvesi - ngenzenjani?
IMPENDULO: Ngiyazwelana nawe ngobuhlungu obhekene nabo. Ngicabanga ukuthi kulele kuwena ukuthi uyaqhubeka yini nokuhlala nalo muntu noma cha.
Mina ngeke ngikwazi ukukuthathela isinqumo. Njengoba ngihlale ngisho, izinto zilungiswa ngomlomo - kufanele nihlale phansi niyikhulume le ndaba, achaze naye ukuthi yini emenza aphinge.
Uma kuwukuthi anisitholi isixazululo kuyofanele sifune usizo kwabanye abantu. Ningaya kubantu abaqeqeshiwe ukweluleka abantu abashadile, ngumfundisi owanihlanganisayo, noma kungenelele abantu abadala basemindenini yenu.
Uma kungukuthi yonke leyo mizamo ayinifikisi ndawo kuyobe kusho ukuthi impela nifinyelele kwangqingetshe. Iyokutshela inhliziyo yakho ukuthi wenze njani.
NGISAYITHANDA INTOMBI ENGAHLUKANA NAYO
PASTOR, nginenkinga yokuthi ngisathanda intokazi engahlukana nayo yize senginenye intombi esingunina wengane yami?
IMPENDULO: Mfowethu ukukhuluma iqiniso nje, le nkinga onayo iningi lethu libhekene nayo. Kuyenzeka empilweni uhlukane nomuntu usamthanda, omunye uhlukane naye ngoba usuthole omunye kodwa bese uphinde umkhumbula.
Akufuneki sigcine sizikhubaza umqondo ngento esingeke senza lutho ngayo noma ngento esibuyisela emuva.
Empilweni kunezinto ekumele sizamukele nje ukuthi sezenzeka, sizedlulise. Uma ushelwe yindlu yangqongqa kulungile ukuyikhumbula ngokuhamba kwesikhathi kodwa lokho kuyikhumbula kwakho ngeke kwayivusa, kufanele ukhohlwe yikho uqhubekele phambili.
Ukukhula empilweni yikhona lokhu sikwazi ukwamukela izinto esezenzekile empilweni, siqhubeke nempilo. Nami uqobo baningi abantu engibakhumbulayo abangasekho empilweni yami.
Ngesinye isikhathi kudingeka uzazi ukuthi ufunani, ungahambi ubamba uyeka.
UMUNTU WAMI AKASICHITHI ISIKHATHI NAMI
PASTOR, nginenkinga, umuntu wami akanandaba nami, umatasa nesonto kodwa futhi akafuni ngiye esontweni naye. Akanaso nje isikhathi sami, angisazi ngenzenjani.
IMPENDULO: Kule nkinga yakho nginemibuzo emibalwa nje - ethi: Yini eyadala nithandane? Nihlanganiswe yini?
Pho usahlaleleni uma ubona engenandaba nawe - yini le ekuhlalisile noma oyincengile kuyena.
Ngihlale ngixwayisa abantu ngokuthi akufuneki uhlale othandweni ngoba uncengile. Angisaphenduli wena wedwa kodwa sengikhuluma nabo bonke abantu abahlukumezekayo ebudlelwaneni abakubo.
Wonke umuntu osebudlelwaneni kufanele abe nesizathu sokuhlala ebudlelwaneni - ungalokothi uhlale kanti awusazazi ukuthi uhlaleleni.
Kubo bonke abafundi bephephandaba lethu ILANGA, siyafisa ukuthi sisizane futhi ngiyafisa ukuniphendula nonke kepha ngebhadi ucingo noma inombolo iyodwa ngakho akulula ukunibamba nonke.
Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
Upastor Sthembiso Zondo ngumeluleki nomethuli wezinkulumo ezakhayo.
Wethula inkulumo ekhuthazayo ngolwesine bese ephendula imibuzo yabafundi ngezinkinga zempilo nezothando KWILANGA Langesonto. Abafuna ukuxhumana noma ukummema, inombolo ithi: 073 795 2292.
Ungamshiyela nomyalezo kufacebook: Sthembiso Zondo Fan page noma kuwhatsapp: 082 070 8034. Abafisa ukukhonza nathi, bazosithola njalo ngesonto ngo-10h00 ejewish Hall. Uma udinga amadirections thumela I-SMS ku: 078 419 1024