ISILILO KUSHONA UMDANSI WASE-KZN
KUKHALWA nxa zonke ngokushona kwentokazi esencane eyaziwa ngokudansela abaculi abadumile u-angel Zulu.
Leli ciko lakwasanti, ethekwini lishiye isililo emphakathini, nakulabo ebelisebenza nabo. ILANGA Langesonto ngesikhathi lizwa indaba yokushona kukaAngel, linikele kubo lafica kugcwele omakhelwane beyobhonga emswanini.
Uchazwe njengomuntu obewusizo emphakathini. Kuthiwa ubehlanganisa izingane zendawo azifundise ukudansa njalo ntambama, aphinde abe nohlelo lokujimisa abantu abasha. Nasekhaya kubo kuthiwa ubewusizo olukhulu. Uxolani Zulu, ongumfowabo, ukhale ngokuthi u-angel nguyena obebheke ikhaya ebambisene nonina.
“Ushona nje ubekade esifakela idstv, ethi ufuna simubone kumabonakude njengoba eqale ngesonto eledlule nje ukuvela kwigqomnation (uhlelo lukamabonakude oludlala esiteshini esitholakala kwidstv),” kuchaza uxolani.
Uthi ubeseqale ukwakhela unina umuzi khona kwasanti.
Ngemali abeyithola emdanswe- ni kuthiwa ubengathengi izicoficofi kodwa ubesebenzela ekhaya.
Umdu Ntombela weqembu lomculo imalini abebuye asebenze nalo u-angel, ukhale kakhulu wathi balahlekelwe.
“Ubesifaka umfutho, noma singena esteji ubesitshela ukuthi siyobangena-ke manje. Silimele kakhulu,” kukhala umdu.
Uwelly Gumede obengumphathi wakhe eqenjini lomdanso i-031 Movement, uthi yize noma ejoyine leli qembu ngonyaka odlule u-angel kodwa isikhala sakhe sikhulu, kuzoba nzima ukusivala.
“Uma kungena yena bekuhlokoma inkundla, enomfutho futhi ehlale egqugquzela ozakwabo ukuba bajime,” kuchaza uwelly.
Uthi ubezinikela ngisho beyodansa mahhala, abuye abameme ngakubo ukuba bayolekelela ezinganeni abezifundisa.
U-angel ushone ngolwesithathu kuleli sonto ngemuva kokugula okumxike mawala emcimbini WEMTV Base obizwa nge Gqomnation e-azar ngeledlule. Ushiye emhlabeni ingane yakhe eneminyaka eyi-7, unina, nomfowabo. Imininingwane yokufihlwa kwakhe ibingakaqinisekiswa ngesikhathi sokushicilela.