Silaxaze imabala isilomo somrepha
Imibiko ithi usayine enkampanini yaphesheya
ISILOMO somrepha waseningizimu Afrika ,unasty C, silaxaza inkampani yodumo imabala Noise Entertainemt, kanti imithombo eyahlukene ithi sesisayine nenkampani yaphesheya kwezilwandle.
ILANGA Langesonto lihoshe ukuthi lo mrepha ogamalakhe langempela ngudavid Ngcobo, usezozinza phesheya kwezilwandle njengoba engasafune lutho oluzomhlanganisa nale nkampani ephethwe ngumnu Reggie Nkabinde.
Unasty C bese kunguyena mculi onegama obese esele kule nkampani kulandela ukuba ishiywe yinqwaba yabaculi abebengasagculisekile ngendlela abebephethwe ngayo.
Omunye umthombo udalule ukuthi bese kunesikhathi lo mrepha oseke wahlabana ngenqwaba yezindondo efuna ukuphuma kule nkampani edume ngokuthi isayinise abaculi nosaziwayo ngezizumbulu zemali.
Umthombo uveze ukuthi unasty C nguyena mculi obesaphethwe ntofontofo ngabaphathi bale nkampani njengoba kuthiwa nguyena obesengenisa imali kuyona.
Leli phephandaba lihabule ukuthi lo mrepha usayine ne-universal Music yaphesheya kwezilwa- ndle futhi iyona esizokwengamela yonke imisebenzi yakhe. Isikhulu semabala Noise okuthiwa yisona esisingethe ukuphathwa kwayo, umnu Skhulile Squicks Nzuza, wenqabile ukwenaba ngokushiya kwalo mculi.
Uthe ngokwazi kwakhe unasty C usengumculi wabo futhi kuningi abamhlelela khona okuzothuthukisa ikusasa lakhe kulo mkhakha.
Isisebenzi sase-universal Music, esingagunyaziwe ukukhuluma nabezindaba sikuqinisekisile ukuthi unasty C usesayine ne-universal Music International. Kulindeleke ukuthi amenyezelwe ngokusemthethweni maduze.
Unasty C uzakhele udumo ngezingoma zakhe okubalwa nehell Naw edle umhlanganiso emncintiswaneni wesouth African Music Awards (SAMA) ngowedlule.
Uphinde wagila izimanga kumametro FM Music Awards ewola izindondo ezahlukene nokuyinto esuse umsindo, abanye baze basola umkhonyovu wokuthengwa kwamavoti. Uphinde wathola nethuba lokuqokwa emncintiswaneni waphesheya kwezilwandle wamaBET.
Imizamo yokuthola lo mrepha iphunzile njengoba ucingo lwakhe belungakhali futhi lungavumi nokuthatha imiyalezo.
Kuzokhumbuleka futhi ukuthi emasontweni edlule leli phephandaba libike ngezithi nesilomo sikamasikandi uthokozani Langa kuthiwa asigculisekile kule nka- mpani.
Nokho ngesikhathi sithintwa, siphikile ukuthi kaseneme, sithi sisaphatheke kahle futhi sisazimisele ngokuhlala.