Kuhle ukuzihlupha ngezifundo zebhayibheli kubazalwane
SIGQUGQUZELA abazalwane ukuba bazihluphe baye ezikoleni zebhayibheli ukuze bakhulume into abayaziyo bangaphambanisi inkulumo, bashumeyele ngendlela engamukelekile. Ngomgqibelo womhla zi-3 kundasa (March) eramalinga Hall, esiphingo, kuzobe kwethulwa izikole zebhayibheli zamahhala.
Abazalwane bayanxuswa ukuba babe khona uma befuna ukusebenzela inkosi ngendlela ehloniphekile.
Kule nkonzo kuzobe kukhona umfu Elphas Ndawonde we-world Bible School angumholi wayo lapha Kwazulu Natal nabanye abaholi bezikole zebhayibheli.
Baningi abazalwane abasizakele ngalezi zikole ezingenzi nzuzo kepha eziphokophele ukukhanyisela isizwe ngombuso wezulu ozayo, ikakhulukazi ngevangeli likajesu Krestu.
Siyaqaphela ukuthi ziningi izinkonzo eseziqhibuke njengamakhowe kepha ulwazi ngenkolo yobukrestu luyagqoza.
Lokho kwenza abashumayeli nabefundisi abangaqeqeshekile ukuba bazenyeze uma sebehlangana nezingqungqulu ezigogodile.
Kuyenzeka ukuba kushone umuntu othile bese kuphoqa ukuthi amahlelo ahlukene abekhona ezofunda izwi kanti abanye bagcina bezenyeza ukuhola inkonzo ngoba bezazi ukuthi kuyashoda elwazini lwebhayibheli.
Ivangeli likakrestu alifuniselwa kumele oliphakayo aliqonde kahle.
Abanye baze bakhe izincwadi ezingekho ebhayibhelini basho ukuthi inkosi isiza ozisizayo uma usumbuza ukuthi likuyiphi incwadi lelo vesi bashone ezintangeni.
Asebeke benza izifundo zebhayibheli bazokwazi ukuthi ziba yisikhombisa izincwadi ezifundwa-o ezichaza kabanzi ngevangeli likaKrestu.
Kulezi zincwadi kukhona konke okuphathelene nomsuka nenqubo yevangeli.
Kuze kube khona nencwadi egxila ekuchazeni usathane uku- thi ungubani namaqhinga akhe onke amabi.
Kulezi zincwadi kuze kungenwe shi odabeni lukamoya Oyingcwele nangezindlela asebenza ngazo kumuntu oyikholwa nokuthi kuyini ukukholwa.
Sike sizwe abantu beshumayela nasezitimeleni bethi ijerusalema umuzi okhanyayo usezulwini kucace ukuthi kumnyama ebusweni benkawu ngoba ijerusalema likhona lapha kwamhlaba kwa-israel.
Okuzwisa ubuhlungu wukuthi emabandleni amaningi abazalwane sebayela ukuyosonta, ukunikela nokucula kanti abaningi bagcwele ezinkonzweni ngoba nje bebheka ukuthi bazozuzani oluza ngakubo.
Isibonelo nje, abanye baya ngoba behehwa wukuthi kulelo bandla kuyathandazelwa ukuze bacebe noma belashwe ekuguleni okusuke kubaphethe.
Indaba yokuthi ekukholweni ingqikithi ngukukhonza unkulunkulu ukuze uma sifa singene ezulwini siphile ingunaphakade (Eternal life) abayandaba nayo.
Yikho lokhu sekwande onantandakubukwa ezinkonzweni nabagaqele imali nobukhazikhazi. Okuyiyona nhloso ayisaziwa, ukuthi unkulunkulu ufuna ukudunyiswa nokuba sihambe kahle endleleni ukuze sithole umqhele ngosuku lokwahlulela.
Abafunde abazalwane siyabanxusa.
Ukumpongoloza amakhorasi nokugwaba kuhle kepha okubalulekile yilokhu esesikushilo.
knowledge.simelane@ilanganews.co.za
Abanye baze bazakhele ngisho izincwadi ezingekho ebhayibhelini...