SIVULA AMEHLO ABACULI:
BANINGI abazibuza umbuzo wokuthi kungani iqembu lesicathamiya, iladysmith Black Mambazo, lilokhu liwola izindondo futhi lihlonishwe umhlaba wonke, kodwa kungabi bikho amanye amaqembu embube ayilandelayo ngempumelelo njengoba asephinde ahlabana ngendondo yomhlaba igrammy Award yesihlanu.
Ngenhlanhla enkulu amambazo amnyama ngibe nethuba lokusondelana nawo engakaziqali izinkambo zawo zaphesheya kwezilwandle, ngaphinde ngahlala endaweni eyodwa nawo eclermont, eminyakeni yowe-1980.
Bese ngivele ngiyintatheli yalo leli phephandaba ngesikhathi imambazo iqala ukudlondlobala ngengoma yayo eyavelela esihloko sithi “Nomathemba.
Leyo ngoma yaphakanyiswa wukudlalwa kakhulu ngowayephethe uhlelo lukacothoza ngaleso sikhathi okhozini FM, kusewuradio Bantu noradio Zulu, umnu Alexius Buthelezi nomfowabo owayephethe ezomcu- lo kulo msakazo, umnu Masonto Buthelezi.
Bobabili oshenge baba neqhaza elikhulu ekuthuthukiseni umculo wemambazo. Babengagcini nje ngokudlala umculo wabo, kepha babeba nezeluleko ngoba bewufundele umculo kangangoba amaqembu amaningi kacothoza ayethwala kanzima ngoba befuna amaphimbo acolisakele nayilandelayo indlela yokucula ngesifuba ( diaphragm) hhayi okumpongoloza ngomphimbo.
Maningi amaqembu esicathamiya angaleso sikhathi ayekhononda ngokuthi imambazo ayiculi wona ucothoza ngoba ingampongolozi kepha yabelesela ngokucula ngendlela yekhethelo, isho ngamaphimbo acolisakele okwenza ukuthi ithandwe yizazi zomculo nemisakazo yonke idlale izingoma zayo ngoba kungekho okusolisayo emculweni wayo, icula i- acappella.
Yilokho okwayenza ukuba noma yibaphi abaculi abacula izinhlobonhlobo zabo bakwazi ukusebenzisana nayo nangazo zonke izilimi. Ngonyaka we-1985 ngesikhathi kubekwa ingonyama umswati 111, eswazini, imambazo yacelwa isipesheli ukuba kube yiyona eyonandisa lapho ngoba yabe ithandwa kakhulu yinkosi usobhuza 11 onguyise wenkosi umswati 111.
Ngesikhathi kubekwa inkosi umswati, ngangikhona kulowo mcimbi, kwenzeka ngeshwa ukuthi imoto yaleli phephandaba yebiwa ngacela ukugitsheliswa emotweni yemambazo.
Angikhohlwa ukuthi ngesikhathi sekumele ikhumbi yemambazo isuke, umholi wemambazo, umnu Joseph Shabalala weza nolofu wesinkwa esinsundu wasihlephula kancane wasinika esisele sahlephulelana sonke sadla, asangayibona into ephembene ngalokho.
Indlela yaba mnandi saze safika eclermont. Ngalokho ngiveza ukuthi abafana bemambazo baqala kanzima bafundiswa ukubekezela nokusebenza kanzima ukuze bafinyelele kuleli zinga abakulo namuhla.
Emuva kwalolo hambo, amambazo agcina esesebenza nopaul Simon neqembu lestimela elali- holwa ngumufi uray Phiri kugrace Land Tour eyagcina ibavulela indlela eya phesheya kwezilwandle.
Umhlaba awubemukelanga ngoba bexhumene nesilomo somhlaba, upaul Simon, kepha yingoba babephethe igolide okungamaphimbo abo amtoti.
Nakhu engikubonile okukhuphule leli qembu lafinyelela kwelenyoni:
Abaculi bayamlalela umholi wabo, bayamhlonipha, izwi lakhe ngelokugcina.
Abajahanga ingcebo. Badle okuncane kwaze kwafika okukhulu. Abazenzanga osiyazi bengazi. Bavalile ngaphansi kwekhala, kabanasipepe.
Imindeni yabo ayigxambukeli ezindabeni zeqembu.
Iqembu linezimenenja ezikhaliphile neziwaziyo umsebenzi. Kukhona eyakuleli neyaphesheya kwezilwandle.
Leli qembu liyasigcina isikhathi, alibuthandi ubuthongo.
Abaculi bayakuthanda uku- funda, iningi labo liqale lingasikhulumi kahle isingisi, kamuva nje lisikhipha ngamakhala.
Ngiyathanda ukusho ukuthi amaqembu esicathamiya awazihluphe ngokufunda izinto, angadazi inkani uma eboniswa ngezinto angazazi.
Lapha ethekwini kunendawo egqugquzela umculo kacothoza, iplayhouse, kukhona nomnu Chris Ntuli osehambe kaningi waya phesheya kwezilwandle namaqembu esicathamiya ngempumelelo.
Uma kungaphela inkani kubaculi balolu hlobo lomculo bazithobe kulokho abangakwazi, balalele, nabo bangazithola izindondo nokuhlonishwa okunikezwa amambazo amnyama.
Lokhu esikusho lapha sisho kulabo abafuna ukuculela inzuzo, abafisa ukuziphilisa ngomculo kodwa kulabo abaziculela ngoba benothando lomculo, akukho mibandela esingababekela yona.
Knowledge.simelane@ilanganews. co.za